O Concello de Silleda inicia a mellora do novo patio da escola infantil A Galiña Azul

Laura Moure/Silleda

O Concello de Silleda iniciará hoxe, xoves 30 de xullo, as obras de mellora do patio exterior da Escola Infantil A Galiña Azul, unha actuación coa que se continuará acondicionando o espazo incorporado ao recinto educativo para ampliar a zona de xogos ao aire libre das nenas e nenos do centro. Os traballos foron adxudicados á empresa Construcciones Celso Novo por un importe próximo aos 10.000 euros e contan cun prazo de execución dun mes.

A actuación permitirá renovar un total de 142 metros cadrados de superficie mediante a colocación de céspede artificial decorativo e antiestático, de 27 milímetros de espesor, un

material axeitado para espazos infantís pola súa resistencia, durabilidade e facilidade de

mantemento.

Antes da colocación do novo céspede será necesario actuar sobre unha superficie de 32 metros cadrados, na que se retirará o pavimento existente, se eliminarán dous tocóns e se

saneará o asfalto deteriorado. Estes traballos previos permitirán regularizar o terreo e garantir unha base firme, estable e segura para completar o acondicionamento do patio.

 PUBLICIDADE

Preme na imaxe para obter máis información deste evento.

Nesta zona executarase tamén unha soleira de formigón, sobre a que se instalará un novo

pavimento de caucho para reforzar a seguridade da área destinada ao xogo infantil. A intervención incluirá, ademais, a plantación dunha árbore, coa finalidade de crear progresivamente unha nova zona de sombra natural e favorecer un uso máis agradable do

patio durante os meses de maior calor.

Esta intervención dá continuidade ao proceso promovido polo Concello para ampliar o patio da escola infantil mediante a incorporación dunha parte do recinto exterior do CEIP de Silleda que se atopaba sen uso.

A incorporación deste espazo foi posible tras as xestións realizadas polo Concello e a sinatura dun convenio entre o Consorcio Galego de Servizos de Igualdade e Benestar, a Consellería de Educación e o Concello de Silleda, que permitiu destinar a parcela á ampliación da zona exterior da escola infantil.

 PUBLICIDADE

Preme na imaxe para obter máis información do evento.

O pasado ano, o Concello executou unha primeira intervención para delimitar e integrar o novo recinto no patio da escola, instalando unha varanda de cores que garante a seguridade das nenas e nenos.

 PUBLICIDADE

Preme na imaxe para obter máis información.

Agora, coa renovación dos pavimentos, a preparación do terreo e a plantación da nova árbore, completarase o acondicionamento deste espazo para o seu uso habitual por parte do alumnado. Con esta actuación, o Concello de Silleda continúa mellorando as instalacións destinadas á infancia e dando resposta ás necesidades do centro, apostando por espazos de xogo máis amplos, seguros, agradables e adaptados ás condicións climáticas.