A tradición dos xenerais na Bandeira e a estrea da figura dos Baldreus en Silleda congregaron a milleiros de persoas durante a fin de semana grande de celebracións
Laura Moure/Xeral
O Concello de Silleda felicita aos colectivos que veñen de promover e organizar as distintas celebracións do entroido no municipio.
Así, á multitudinaria cita do entroido o sábado na Bandeira, co tradicional Alto Infantil e Alto dos Xenerais, organizado pola Asociación Xenerais da Bandeira e ás primeiras batallas diálecticas do pasado día 11 en Lamela, da man da asociación Anxela, sumouse o grande éxito acadado polo Domingo de Baldreus, promovido por SIC Iniciativas Culturais, en colaboración ca Asociación Cultural O Lacón, Banda de Música Municipal, ECOS, a SD
Silleda e Anpa Raparigos.
“Despois de dous anos de pandemia o entroido rexurdiu con forza e éxitos no noso municipio, grazas ao traballo e ao esforzo destes colectivos que co apoio do Concello, conseguiron sorprendernos e facernos disfrutar nunha festa moi arraigada en toda Galicia”, sinala o alcalde, Manuel Cuiña.
Á tradición dos Xenerais, festa de Interese Turístico, que pervive a día de hoxe na Bandeira e na parroquia de Lamela, súmase agora a figura dos Baldreus en Silleda, que luciron acompañados do Demo de Carboeiro e Frei Lourenzo na cita dominical, tamén ca estrea do Vermú dos mandís. “Temos un tecido asociativo que é un dos nosos grandes tesouros, e que está detrás de éxitos como o que vivimos ao longo desta fin de semana”, indica Cuiña.
Festas infantis para rematar a programación
A programación do Entroido no municipio terá como protagonistas aos nenos e nenas, con senllas festas. A primeira delas será hoxe luns de entroido, ca xa tradicional celebración que organiza o Centro Cultural
Vista Alegre da Bandeira
E mañá martes, a partir das 17:00 horas terá lugar outra sesión infantil na praza Juan Salgueiro de Silleda.
Comments