O Concello de Silleda e o BNG celebran o regreso a Galicia das dúas figuras do tímpano de Carboeiro

Ambos piden que se devolvan ao mosteiro silledense

Laura Moure/Silleda

O Concello de Silleda e o BNG amosa a súa satisfacción polo acordo anunciado entre a Xunta de Galicia e o Concello de Barcelona que fará posible que dúas das figuras expoliadas do tímpano do Mosteiro de San Lourenzo de Carboeiro regresen a Galicia. O goberno municipal considera esta xornada “histórica” para Galicia e, de xeito especial, para a veciñanza de Silleda e da comarca, ao tratarse dun paso decisivo na reparación dunha inxustiza patrimonial que se prolongou durante décadas. O Concello lembra que estas pezas formaban parte da portada principal do cenobio sendo obxecto, a finais dos anos 50, tal e como recolleron distintas investigacións e documentación histórica do expolio ao que foi sometido o monumento.

“Contentos, pero co obxectivo claro: Carboeiro”

“Dende o Concello de Silleda valoramos moi positivamente que as figuras volvan ao territorio galego. Con todo, trasladamos tamén con claridade a nosa aspiración: que nun futuro poidan retornar ao seu lugar de orixe, o Mosteiro de Carboeiro, para recuperar a lectura completa do conxunto románico e reparar plenamente o vínculo co espazo ao que pertencen e do que foron arrincadas hai 70 anos”, indica a alcaldesa, Paula Fernández.

 Publicidade/DOAZÓN PARA ECOS DA COMARCA

Para o goberno municipal, a volta das esculturas ao seu lugar de orixe é incuestionable, polo que se fai un chamamento ás Administracións supramunicipais “para a posta en marcha, dunha vez por todas” dun Plan de Musealización do Mosteiro , que permita amosar estas pezas nas condicións que esixe o Museo Marés , condicións que ata o momento só cumpliría o Museo das Peregrinacións.

20 anos de reclamacións

A rexedora indica que con este acordo se pon fin a “20 anos de reclamación, lembrando que xa no ano 2006, a Mancomunidade Terras do Deza aprobou por unanimidade unha moción do grupo socialista da comarca, para reclamar oficialmente ao Concello de Barcelona a propiedade das esculturas e solicitar á Xunta que realizase as actuacións necesarias para facilitar o seu retorno. Daquela, o Museo Marés rexeitara a solicitude indicando que as pezas foran adquiridas lexitimamente á familia Birk en 1980.

Logo dun novo intento en 2017 a raíz do caso de Sijena (Aragón), o empuxe definitivo chegou co achádego do investigador e historiador Francisco Prado-Vilar, que hai agora tres anos desvelaba os documentos da denuncia que acreditaron que as dúas pezas foran sustraídas de xeito ilegal.

Dende o Concello queren tamén poñer en valor o traballo de investigación que axudou a abrir o camiño definitivo cara á devolución e contribuíu a consolidar a fundamentación da reclamación e a activar con máis forza as vías institucionais para o xusto retorno.

Pola súa banda, o BNG de Silleda celebra tamén o acordo e sinala que o traslado estaba previsto para este martes, mais tivo que ser adiado pola borrasca Joseph, que impediu a

chegada da delegación catalá a Santiago.

"As pezas —un Cristo en Maxestade e unha talla cos símbolos de San Lucas e San Xoán— foran roubadas en 1957 e acabaron décadas máis tarde no Museu Frederic Marès de Barcelona, onde permanecían expostas. As investigacións do historiador Francisco Prado Vilar foron decisivas para documentar o espolio e permitir que as administracións recoñecesen a súa procedencia ilícita", recalca o Bloque.

Desde o BNG de Silleda lembran tamén que este avance non sería posible sen o traballo constante no Parlamento Galego das deputadas Ariadna Fernández, da comarca do Deza, e Mercedes Queixas, que durante estes anos mantiveron viva a demanda institucional para a súa restitución.

“Hoxe unha parte da nosa historia comeza o camiño de volta”

A portavoz do BNG de Silleda, Erea Rey, sinalou que esta é “unha xornada emocionante para o noso concello e para o país”, celebrando que “unha parte da nosa historia e do noso patrimonio volta á súa casa”. Subliñou que estas esculturas “non son só de todos os silledenses, senón tamén de todo o pobo galego”.

Rey insistiu en que o obxectivo final debe ser claro: “Gustaríanos que estas pezas puidesen estar expostas na súa casa, Carboeiro; pero para iso ten que existir unha vontade política real para levar adiante un proxecto ambicioso de musealización”.

 Publicidade

Preme na imaxe para obter máis información.

Un proxecto de futuro: musealizar Carboeiro e recuperar a integridade do monumento

O BNG de Silleda lembra tamén que o regreso das esculturas é só un primeiro paso cara ao obxectivo maior: que algún día poidan volver ao seu lugar de orixe, o tímpano do Mosteiro de Carboeiro, para recuperar a lectura completa dun dos conxuntos románicos

máis importantes do país. O Bloque considera imprescindible que as administracións supramunicipais —Deputación de Pontevedra e Consellería de Cultura da Xunta de Galicia— se impliquen de maneira decidida nun plan urxente de conservación do Mosteiro e na musealización integral do monumento e da súa contorna natural, un espazo de enorme valor patrimonial e turístico situado a poucos minutos da fervenza do Toxa.

Compromiso do BNG

Desde o BNG de Silleda remarcan que, se no futuro teñen a responsabilidade de gobernar o concello, promoverán e impulsarán activamente este proxecto, porque “Carboeiro é unha das xoias do noso patrimonio e merece contar coas condicións necesarias para que as pezas regresen ao lugar do que nunca deberon saír”. O regreso das esculturas, conclúen, “dános a razón a todas as persoas e colectivos que insistimos en que había que traballar sen descanso para recuperar o que é noso”.

Publicidade

Preme para contactar con nós e pregunta polas tarifas que son unha bicoca!

Chamamento á Xunta e á Deputación: conservación urxente e luz eléctrica

Así mesmo, dende o goberno municipal tamén se fai un chamamento explícito ás administracións supramunicipais —Xunta de Galicia e Deputación de Pontevedra— co fin de impulsar un plan decidido e dotado economicamente para a conservación e mellora do Mosteiro de Carboeiro, un dos primeiros monumentos protexidos de Galicia, declarado Monumento Histórico-Artístico no ano 1931 (hoxe Ben de Interese Cultural).

A pesar do esforzo que está a asumir o Concello, a situación actual supera xa as capacidades municipais e vai máis aló das tarefas de mantemento. Entre outras necesidades, o goberno local alerta de deficiencias de conservación e seguridade, con zonas sinalizadas por risco e elementos estruturais que requiren actuacións inmediatas, e de maneira especial a falta de subministro eléctrico. “A musealización que vimos reclamando dende hai anos e que facilitaría a volta das esculturas ao lugar de onde nunca deberon de saír, debe comenzar con esa aposta clara”, indica a alcaldesa. O Concello considera prioritaria a dotación de subministración eléctrica no mosteiro, unha carencia que condiciona o traballo diario da persoa que atende o recinto durante todo o ano, a mellora da experiencia de visita e da musealización, actividades culturais e, do mesmo

xeito, calquera hipótese futura de retorno das pezas ao seu emprazamento orixinal.