O Concello de Rodeiro impulsará durante o mes de agosto unha programación para todas as idades

Laura Moure/Rodeiro

O Concello de Rodeiro impulsará durante o mes de agosto unha programación de actividades para todas as idades co obxectivo de dinamizar o verán, fomentar a convivencia e consolidar o municipio como un destino atractivo para o lecer, a natureza e o turismo. A proposta combina deporte, actividades familiares, ocio xuvenil e a celebración dun acontecemento astronómico excepcional, como é o eclipse solar do vindeiro 12 de agosto, que converterá Rodeiro nun dos mellores lugares de Galicia para a súa observación.

 PUBLICIDADE

Preme na imaxe para obter máis información deste evento.

A programación arrancará o 8 de agosto coa tradicional Festa Acuática na Piscina Municipal, unha xornada con inchables acuáticos, música, animación, actividades deportivas e petiscos pensada para o desfrute de familias e veciñanza. Entre os días 12 e 14 de agosto celebrarase a Acampada Xuvenil no Monte Suíme, dirixida a mozos e mozas de entre 9 e 15 anos, que combinará actividades de aventura, convivencia e educación ambiental, incluíndo tamén a observación do eclipse solar.

PUBLICIDADE

Preme na imaxe para obter máis información do evento.

Precisamente, o eclipse será un dos grandes protagonistas do verán en Rodeiro. O Concello habilitará os miradoiros de Val de Camba e Espasante como puntos recomendados para seguir este fenómeno astronómico, facilitando o acceso á información mediante códigos QR e repartindo gafas homologadas para a observación segura do eclipse, co fin de que a cidadanía e as persoas visitantes poidan desfrutar deste acontecemento con todas as garantías de seguridade.

 PUBLICIDADE

Preme na imaxe para obter máis información do evento.

O alcalde en funcións, Alberte Lamazares, e a concelleira de Cultura, Xulia Dacal, subliñan que "esta programación nace coa vontade de ofrecer un verán activo e participativo, con propostas para todas as idades que fomenten a convivencia, o deporte e o desfrute da natureza. Ao mesmo tempo, queremos aproveitar a oportunidade que supón o eclipse solar para amosar Rodeiro como un concello acolledor, con recursos naturais e paisaxísticos únicos e cunha ampla oferta de actividades para veciñanza e visitantes."

PUBLICIDADE

Preme na imaxe para obter máis información.

O Goberno municipal destaca que esta programación forma parte dunha estratexia para reforzar a actividade social, cultural e turística, promover hábitos de vida saudables, apoiar o comercio e a hostalaría locais e poñer en valor a riqueza paisaxística e o patrimonio natural de Rodeiro, aproveitando a repercusión dun evento de alcance internacional para proxectar a imaxe do concello dentro e fóra de Galicia.