O Concello de Melide clausura con éxito os Campamentos de verán 2025
- Laura Moure
- hace 3 días
- 2 Min. de lectura
As nenas e nenos poñen o broche final a un verán cheo de aventuras, aprendizaxe e diversión
Laura Moure/Melide
O pasado venres, 8 de agosto, clausuráronse oficialmente os Campamentos de Verán 2025 organizados polo Concello de Melide, nun acto que contou coa presenza da concelleira de Cultura, Ana Mosteiro, quen destacou “o valor educativo, inclusivo e
comunitario” desta iniciativa que cada ano suma máis participantes. Foron sete intensas semanas nas que preto de 200 nenas e nenos de entre 4 e 12 anos gozaron dun completo programa de actividades lúdicas, deportivas, culturais e medioambientais.

Baixo o lema “Un campamento de conto”, os campamentos desenvolveron propostas temáticas inspiradas en personaxes e historias clásicas e contemporáneas como Futbolísimos, Canastones, O Principiño, Tintín, Mowgly, Pocahontas ou Buscando a Wally. Cada semana foi unha nova aventura adaptada ás idades e necesidades dos diferentes grupos, promovendo sempre valores como a convivencia, o respecto e a creatividade.
Durante estas semanas, a cativada participou en obradoiros artísticos, xogos populares, rutas pola natureza, actividades deportivas e visitas culturais. Entre os momentos máis destacados desta edición cómpre lembrar: A visita á imprenta Meligraf, onde fixeron un taller de encadernación artesanal. O obradoiro de elaboración de xeados artesáns na xeadería Borboriño, onde coñeceron o proceso e ingredientes naturais. Un taller de repostaría tradicional na pastelería Estilo, no que prepararon doces típicos da zona. A visita didáctica á peixería Manolo, onde aprenderon a identificar especies de peixe e marisco, e a importancia do consumo responsable.
Publicidade
Estas actividades, desenvolvidas en colaboración coa Asociación de Empresarios Terra de Melide (ASETEM) e co apoio dos propios negocios participantes, tiveron como obxectivo achegar o comercio de proximidade á infancia, favorecendo unha experiencia didáctica e divertida que aproveita os recursos e saberes da vila para aprender dende o propio entorno.
Tamén se realizaron outras propostas que causaron grande entusiasmo entre a rapazada, como os xogos de auga, ideais para refrescarse e fomentar o traballo en equipo, e a visita á Cidade da Cultura, onde participaron nas exposicións interactivas Orixes e Mirar por Galicia, esta última centrada na figura de Castelao.
Ademais, houbo actividades deportivas con xogadores profesionais como Noel (Dreman Futsal) e Teo Gómez (Noia FS), un espectáculo de maxia co mago Jorge Lorenzo, a visita dos bombeiros de Arzúa e propostas medioambientais como a ruta da auga en Guitiriz ou a visita ao Centro Etnográfico de Teixeiro.
Os campamentos contaron, un ano máis, cunha forte aposta pola inclusión, garantindo a participación plena de nenas e nenos con necesidades específicas de apoio educativo, nomeadamente con Trastorno do Espectro Autista (TEA). Para iso, o Concello proporcionou recursos humanos especializados e actividades adaptadas en grupos reducidos.
Publicidade
O equipo de monitores e monitoras foi fundamental para o éxito desta edición, creando espazos seguros, dinámicos e afectivos que favorecen o desenvolvemento integral da infancia durante o período vacacional.
O Concello de Melide agradece a todas as familias a súa confianza e implicación, así como ao persoal técnico, entidades colaboradoras, negocios locais e ASETEM o seu compromiso para facer destes campamentos unha experiencia inesquecible. A organización xa traballa en novas propostas para o vindeiro verán, coa ilusión de seguir ofrecendo un servizo de calidade que combine conciliación, inclusión e diversión.
Comments