O Concello de Arzúa pon en marcha “Bos Días Cole” para facilitar a conciliación das familias

O prazo de inscrición está aberto dende hoxe, 25 de agosto, ata 4 de setembro

Laura Moure/Arzúa

O Concello de Arzúa, a través da Concellería de Xuventude e Infancia, porá en marcha o vindeiro 9 de setembro o servizo de mañanceiros “Bos Días Cole” no CEIP de Arzúa, co obxectivo de facilitar ás familias a conciliación da vida laboral e familiar antes do inicio da xornada lectiva.

O Concello dá así cumprimento ao compromiso adquirido coas ANPA de asumir desde o ámbito municipal un servizo que ata agora viña desenvolvendo a ANPA Xermolos, facendo que a súa organización e prestación pasen a depender directamente do Concello.

O servizo prestarase de 7:30 a 9:30 horas e permitirá que os nenos e nenas permanezan atendidos no centro educativo desde primeira hora da mañá, nun espazo seguro e adaptado ás súas necesidades.

 PUBLICIDADE

Preme na imaxe para obter máis información deste evento.

“Queremos agradecer e poñer en valor o traballo que a ANPA Xermolos vén realizando durante estes anos para facilitar a conciliación das familias. O noso compromiso sempre foi que este servizo pasase a ser municipal, porque entendemos que unha necesidade destas características debe ter unha resposta desde o propio Concello. Agora damos cumprimento a ese compromiso asumindo a súa organización e prestación”, sinala o concelleiro de Xuventude e Infancia, Daniel Moscoso.

Acollida, actividades e almorzo

“Bos Días Cole” incluirá a acollida, recepción e vixilancia dos escolares desde a súa chegada ao centro e ata o inicio da xornada lectiva. Durante ese tempo desenvolveranse tamén xogos e actividades participativas e educativas, adaptadas ás diferentes idades e orientadas a fomentar hábitos saudables, a convivencia, a solidariedade, o respecto e a integración.

O servizo contará ademais con almorzo, cunha proposta variada e nutricionalmente equilibrada.

Un servizo flexible para as familias

As familias poderán facer uso de “Bos Días Cole” de maneira fixa ou esporádica, en función das súas necesidades.

 PUBLICIDADE

Preme na imaxe para contactar connosco.

A modalidade fixa mensual estará dirixida ás persoas usuarias que precisen o servizo todos os días lectivos do mes ou durante un número de días igual ou superior á metade dos días lectivos. A modalidade esporádica permitirá utilizalo en días soltos, con carácter xeral mediante aviso cun día de antelación.

O prazo de inscrición estará aberto do martes 25 de agosto ao venres 4 de setembro. O Concello celebrará ademais o luns 7 de setembro unha reunión informativa coas familias e coa empresa responsable da prestación do servizo, antes da súa posta en marcha o mércores 9 de setembro.