O BNG leva ao Concello de Cruces o malestar das persoas usuarias pola situación da Carixa
Álex Fiúza reclama explicacións sobre os chiringuitos, os aseos, o mantemento e o futuro da área recreativa
Ecos da Comarca/Vila de Cruces
O BNG de Vila de Cruces trasladará ao Concello o malestar que lle están facendo chegar
persoas usuarias habituais da Área Recreativa da Carixa, en Merza, ante a situación na que se atopan diferentes servizos e instalacións dun dos principais espazos de ocio do
municipio.
Segundo denuncia a formación nacionalista, "os dous chiringuitos están adxudicados á
mesma persoa, un deles non estaría funcionando con normalidade, existen aseos pechados e determinadas tarefas de mantemento da área están sendo asumidas polo propio Concello", cuestións que o BNG considera necesario aclarar.
“Son persoas que utilizan habitualmente a Carixa e que nos trasladan o seu malestar
porque ven como un espazo que debería estar perfectamente coidado e dotado de servizos non está á altura do que merece”, sinala Álex Fiúza, portavoz do BNG.
Por este motivo, o BNG rexistrará no Concello unha batería de preguntas para coñecer en que condicións se concederon os chiringuitos, que obrigas ten a concesionaria, que mecanismos de control está aplicando o Concello e se se están cumprindo as condicións
dos contratos.
PUBLICIDADE
A formación nacionalista tamén solicitará documentación sobre as concesións, inspeccións
realizadas, posibles incumprimentos e os gastos que está asumindo o Concello en limpeza, mantemento e conservación da área, ademais dos proxectos previstos para mellorar o aparcamento e a zona de autocaravanas.
PUBLICIDADE
“A Carixa non pode funcionar por inercia. Se hai unhas condicións na concesión, hai que
facelas cumprir, e se os pregos non son realistas, hai que modificalos. O que non pode ser é que as persoas usuarias paguen as consecuencias da falta de planificación do goberno
municipal”, conclúe Fiúza.
Comentarios