O BNG de Arzúa rexistra emendas aos orzamentos da Xunta para reconstruir a ponte de Maroxo

Tamén introduce a necesidade dunha reforma integral do CEIP de Arzúa, a recuperación do complexo deportivo de Portodemouros e o incremento de solo industrial

Ecos da Comarca/Arzúa

O BNG de Arzúa vén de presentar as emendas rexistradas aos orzamentos da Xunta de Galiza para o ano 2026. Desde a organización nacionalista sinalan que o proxecto presentado polo goberno do Partido Popular é "decepcionante e non vai axudar a solucionar os problemas que lle afectan a día de hoxe ás galegas e galegos". Ademais, sinala Xurxo Gómez, responsábel local, “vemos como o Partido Popular destina a indecente cantidade de 0€ a Arzúa para atender as necesidades que ten a poboación nunhas contas que tampouco son quen de medrar por riba do que medrou a inflación e non dan resposta á situación límite na que se atopan servizos esenciais coma a sanidade, a educación ou a dependencia".

Fronte a isto, o BNG rexistrou emendas ás contas presentadas polo Partido Popular para poder prestar atención e solucionar necesidades urxentes da veciñanza arzuá, como é a reparación da ponte caída sobre o río Iso en Maroxo. “O BNG leva un ano traballando desde o Concello para a reconstrución dunha infraestrutura claramente necesaria e por iso, unha vez que se tivo o proxecto para esta obra, solicitáronse xuntanzas con Augas de Galiza e coa Consellería de Medio Rural, así coma co Ministerio de Transportes, mais sen ningunha resposta”, apunta Gómez.

 Publicidade

Preme na imaxe para obter máis información.

Neste senso, Iria Carreira, deputada o Parlamento galego salienta a introdución dunha emenda para esta infraestrutura, sinalando a importancia da colaboración entre as diferentes institucións que teñen responsabilidades sobre a caída desta ponte para enfrontar un proxecto que supera os 300.000€ de orzamento “pois non podemos obviar o estado de abandono no que se atopaba o leito do río Iso previamente e sobre o cal ten a responsabilidade Augas de Galiza”, salienta Carreira. Un proxecto que “tería un grande impacto sobre as contas dun concello coma Arzúa, poñendo en risco outros investimentos e servizos nun contexto onde ademais os gobernos municipais están asumindo competencias que non lle son propias e que minguan aínda máis a súa capacidade orzamentaria”.

Publicidade

Preme para contactar con nós e pregunta polas tarifas que son unha bicoca!

Outras emendas formuladas pola formación nacionalista son a consignación de partidas específicas para a realización dunha reforma integral do CEIP de Arzúa, para o incremento de chan industrial no municipio e para a rehabilitación do complexo deportivo de Portodemouros. “Estas son necesidades constatadas por entidades e veciñanza arzuás, fundamentais para o desenvolvemento do noso concello”, apunta Iria Carreira. “O Partido Popular non pode seguir ignorando a Arzúa e utilizando os orzamentos da Xunta de Galiza de xeito partidista”, conclúe.