O BNG de Arzúa reclama ao PP "rigor e non usar partidistamente o futuro empresarial de Arzúa"

As e os nacionalistas comproméntese desde a alcaldía a impulsar un proceso participativo, avalado por informes técnicos e estudos de viabilidade, no debate sobre o futuro do polígono industrial

Ecos da Comarca/Arzúa

O grupo municipal do BNG no Concello de Arzúa sinala que non apoiou a moción presentada polo Partido Popular no pleno do pasado 2 de outubro sobre o polígono industrial, ao considerar que un asunto de tanta relevancia para o futuro económico do municipio debe abordarse con rigor e cun proceso participativo, avalado por informes técnicos e estudos de viabilidade.

A proposta do PP consiste en trasladar o polígono industrial a Pastoriza, mais desde o BNG critican que “non existe ningún informe técnico que avale esa decisión, nin tampouco un estudo de viabilidade que a sustente, e só se alude a supostas reunións con AECA e Xestur das que o goberno municipal nunca tivo constancia”. Ademais, lembran que esas propostas “nunca foron trasladadas formalmente nin por parte de AECA nin de Xestur ao Concello de Arzúa”. Para o grupo nacionalista, isto demostra que “o PP está a facer un uso partidista e electoralista dun asunto estratéxico para o futuro de Arzúa”.

Estudo rigoroso e apoio da Xunta de Galiza

A portavoz do BNG, Lucía López, lembrou no pleno que “compartimos a preocupación sobre a necesidade de dotar a Arzúa de máis opcións de chan industrial, pero tamén temos claro que un asunto de semellante importancia non se despacha cunha moción tan sinxela e na que se aseguran cuestións das que habería que ter un contraste real e cuantificado”.

 PUBLICIDADE

Engadiu que “o que podemos facer desde o goberno municipal é comprometernos a facer as cousas ben: solicitando un estudo económico e técnico rigoroso que avalíe cal é a mellor opción para ampliar o chan industrial do noso concello, con datos reais, criterios de viabilidade e visión de futuro”.

Neste sentido, a portavoz salientou que “é imprescindible ter en conta tamén a realidade das empresas que xa están instaladas no polígono actual, coñecer as súas necesidades e avaliar como se verían afectadas por calquera modificación ou traslado”.

López avanzou que “impulsaremos unha rolda de contactos e unha reunión aberta con todas as entidades e particulares interesados, para que o futuro do polígono industrial de Arzúa sexa consensuado, participado e pensado a medio e longo prazo, non para unha utilización partidista e electoralista como a que fai o PP con esta moción”.

PUBLICIDADE

Preme na imaxe se queres contactar connosco.

Por último, engadiu que “unha vez que se produzan esas reunións esperamos contar co apoio técnico e económico da Xunta de Galiza, porque a experiencia dinos que Arzúa leva anos abandonada nesta e noutras moitas materias en canto a investimento institucional”.

O que dixo o PP sobre isto: https://www.ecosdacomarca.com/post/o-pp-de-arz%C3%BAa-lamenta-que-o-tripartito-non-votara-decididamente-pola-s%C3%BAa-a-iniciativa-de-impulsar-no