O actor Carlos Blanco será o pregoeiro da L Festa da Empanada da Bandeira
- Laura Moure
- 2 ago
- 5 min de lectura
O Bandeirock abrirá as celebracións o xoves 20 con Rebeliom do Inframundo, Loita Amada e Javi Maneiro como cabezas de cartel
Laura Moure/Silleda
A vila da Bandeira prepárase para celebrar unha edición histórica da súa festa máis emblemática. A L Festa da Empanada, declarada de Interese Turístico Nacional, desenvolverase do xoves 20 ao domingo 23 de agosto próximos cun amplo programa de actividades gastronómicas, musicais, culturais e tradicionais.
A programación foi presentada este sábado na praza da vila nun acto organizado pola
Asociación Amigos da Empanada da Bandeira, presidida por Manuel Cuiña. Na presentación participaron tamén a alcaldesa de Silleda, Paula Fernández; a directora de
Turismo Rías Baixas da Deputación de Pontevedra, Romina Fernández, e o secretario xeral
de Política Lingüística, Valentín García, en nome da Xunta de Galicia.
O acto serviu para descubrir os carteis desta edición e para realizar un percorrido pola historia da celebración, coa exposición dos carteis das cincuenta edicións da Festa da
Empanada. Unha mostra que permite comprobar a evolución gráfica, cultural e festiva dunha cita que forma parte da identidade da Bandeira e que cada ano atrae milleiros de persoas.
O cartel principal da L edición foi creado pola artista silledense Tania Cuiña, que reinterpreta unha das imaxes máis recoñecibles da Capela Sixtina: A creación de Adán, de Miguel Anxo. Na composición, a empanada convértese no elemento que une as dúas mans, nunha homenaxe artística, orixinal e simbólica ao prato arredor do que naceu a festa.
PUBLICIDADE
Durante a presentación, Manuel Cuiña agradeceu o apoio das administracións públicas, das empresas patrocinadoras, do tecido comercial, das asociacións, das persoas socias e de toda a veciñanza que colabora na organización. O presidente de Amigos da Empanada
destacou especialmente o traballo colectivo realizado ao longo de medio século para facer medrar unha celebración que hoxe conta co máximo recoñecemento turístico estatal.
O acto central
O actor, humorista, autor e director galego Carlos Blanco será o encargado de pronunciar o pregón da Festa da Empanada o sábado 22 de agosto. Cunha ampla traxectoria no teatro, no cinema, na radio e na televisión, Blanco é un dos rostros máis populares da escena galega, coñecido tamén pola súa faceta como monologuista e pola súa participación e producións como Mareas Vivas ou Fariña.
O acto central da L edición comezará ás 18.00 horas e estará presentado por Cristina
Collazo e Josito Porto. Contará coa actuación da Asociación Cultural Xirandola, o tradicional concurso de empanadas, o pregón de Carlos Blanco e a posterior poxa das pezas premiadas, que volverá estar conducida por Pepe Ayude.
As empanadas participantes no concurso poderán entregarse a partir das 16:00 horas. Un
xurado profesional valorará as propostas presentadas nas categorías afeccionada e profesional, tendo en conta aspectos como o sabor, a presentación e a orixinalidade.
A xornada continuará ás 22:00 horas coa tradicional e multitudinaria cea de peñas, amenizada por Leña Verde e Os Atrevidos. A partir da medianoite, a verbena correrá a
cargo das orquestras Olympus e París de Noia no entorno da carballeira.
A ruta da empanadilla e o Bandeirock abren a programación
As celebracións na vila comezarán o xoves 20 de agosto ás 18:00 horas coa XIV Ruta da
Empanadilla polos bares da vila, amenizada pola charanga local Os Gominolas.
Ás 20:30 horas, a Carballeira da Pomba acollerá a 24ª edición do Bandeirock, un festival
con entrada de balde que reunirá propostas destacadas do rock, o rap e a música alternativa galega.
O cartel estará integrado por A Banda no Rock, -concerto didactico da compañía local A Cova das Letras con Cristina Collazo Josito Porto e a Banda da Bandeira- Rebeliom do Inframundo, Arrhythmia, Loita Amada, Javi Maneiro, (estes dous últimos a través do
programa Máis Música) Marela e Storrentos. Rebeliom do Inframundo levará á Bandeira o seu rap combativo en galego, mesturado con electrónica, rock e elementos da música
tradicional, mentres Arrhythmia achegará a potencia do seu metal alternativo.
PUBLICIDADE
Preme na imaxe para obter máis información do evento.
A presenza de Javi Maneiro, unha das voces máis recoñecibles do rock galego, de Loita
Amada co seu rock comprometido e do grupo local Marela reforza unha programación que
combina nomes consolidados con formacións vinculadas á escena musical máis próxima.
O Esmorga Folk chega á súa XXXVI edición
O venres 21 de agosto estará dedicado á música de raíz. A programación comezará ás
17:00 horas con xogos tradicionais a cargo de Sororas e continuará ás 18:00 horas co XII
Campionato de Tiro á Corda, que se celebrará na rúa Xeral.
A partir das 20:30 horas, a Carballeira da Pomba converterase no escenario da XXXVI
edición do Esmorga Folk, un dos encontros máis veteranos e recoñecidos da música
tradicional galega.
O cartel reúne a Cantos da Terra, A Banda da Loba, De Vacas, Xabier Díaz & Adufeiras de
Salitre, L.A.W., Mediarea e As Estraloqueiras. Xabier Díaz e as Adufeiras de Salitre chegarán cunha proposta que parte da música tradicional e da percusión para explorar novas sonoridades. A Banda da Loba presentará o seu universo musical e poético, cunha proposta que mestura pop, folk e letras comprometidas. Pola súa banda, De Vacas achegará as súas características versións en galego, marcadas polo humor, as harmonías vocais e unha posta en escena teatral e reivindicativa.
Tradición e música de banda para pechar as festas
O sábado 22, antes dos actos centrais da Festa da Empanada, celebrarase ás 12:00 horas
a misa e procesión. Ás 13:00 horas terá lugar o concerto da Banda de Veteranos da Bandeira.
PUBLICIDADE
O domingo 23 estará dedicado especialmente ás bandas de música. Ás 11:30 horas haberá pasarrúas a cargo da Banda de Música Municipal de Silleda e da Banda Artística de Merza.
Ás 12:00 horas celebrarase a misa cantada polo Coro Vales Mahía e, ás 13:00 horas, ambas as formacións ofrecerán un concerto.
PUBLICIDADE
A programación rematará ás 20:00 horas cun concerto conxunto da Banda Recreativa e
Cultural da Bandeira, a Banda de Música Municipal de Silleda e a Banda Artística de Merza.
Á medianoite, unha sesión de fogos de artificio porá o punto final aos catro días de
celebración.
PUBLICIDADE
A alcaldesa, Paula Fernández, destacou durante a presentación “a enorme dimensión
cultural, social, turística e económica dunha festa construída durante cincuenta edicións
grazas ao traballo de moitas xeracións”. “Falamos dunha celebración que identifica á Bandeira e a todo o municipio de Silleda, que proxecta a nosa gastronomía e que soubo medrar sen perder a súa esencia. Esta L edición é unha oportunidade para recoñecer ás persoas que fixeron posible este camiño e para seguir mirando ao futuro”, sinalou.
Fernández reiterou o apoio do Concello á Asociación Amigos da Empanada e agradeceu o
esforzo realizado para ofrecer unha programación “ambiciosa, diversa e aberta a todos os
públicos”, arredor dunha festa que combina gastronomía, cultura e tradición.
Comentarios