Nace Xadrez Pintor Colmeiro de Silleda, unha nova iniciativa aberta a toda a veciñanza
A entidade, impulsada polo profesor Santiago Cerviño, celebra sesións todos os xoves a partir das 18:00 horas nas instalacións do IES Pintor Colmeiro
Laura Moure/Silleda
O Concello de Silleda amosa o seu apoio á posta en marcha do novo Club de Xadrez Pintor Colmeiro, unha iniciativa que nace coa vocación de fomentar a práctica desta disciplina no municipio e ofrecer un novo espazo de aprendizaxe, encontro e convivencia aberto a toda a veciñanza. O club, impulsado por Santiago Cerviño, profesor do IES Pintor Colmeiro e natural da Bandeira, ten a súa sede nas instalacións do propio centro educativo, onde se desenvolven as sesións todos os xoves a partir das 18:00 horas.
A actividade está aberta tanto a nenos e nenas como a persoas adultas, independentemente da súa idade, co obxectivo de achegar o xadrez a todas aquelas persoas interesadas en iniciarse nesta disciplina ou continuar perfeccionando os seus coñecementos.
A creación desta nova entidade responde ao interese existente polo xadrez entre alumnado e veciñanza da zona, ofrecendo unha estrutura estable para canalizar esta afección e favorecer a súa práctica regular.
PUBLICIDADE
Unha actividade con múltiples beneficios
Dende o Concello de Silleda valórase especialmente a dimensión educativa, social e de benestar desta iniciativa, tendo en conta os múltiples beneficios que pode achegar a práctica do xadrez en todas as etapas da vida.
Trátase dunha disciplina que estimula capacidades cognitivas como a atención, a memoria, a concentración, o razoamento lóxico e a planificación, ao tempo que favorece o desenvolvemento de habilidades como a paciencia, a toma de decisións, a resolución de problemas e o respecto polas normas.
Ademais, o xadrez constitúe unha alternativa de lecer saudable que pode contribuír ao benestar emocional e á socialización, ofrecendo oportunidades para compartir tempo e experiencias entre persoas de diferentes idades. O goberno municipal agradece igualmente a implicación de Santiago Cerviño e a colaboración do IES Pintor Colmeiro para facer realidade esta proposta, que contribúe a ampliar e diversificar a oferta de actividades no municipio.
PUBLICIDADE
Sesións todos os xoves
As persoas interesadas en participar poden acudir ás sesións que se celebran todos os xoves, a partir das 18:00 horas, no IES Pintor Colmeiro de Silleda. Para obter máis información ou contactar coa entidade, está dispoñible o correo electrónico xadrezpintorcolmeiro@gmail.com e o teléfono 986 580 904.
Dende o Concello anímase á veciñanza a coñecer esta nova proposta, que abre unha oportunidade para descubrir ou recuperar a afección polo xadrez nun ambiente participativo e aberto a todas as xeracións.
Comentarios