Melide remata as obras de mellora da pavimentación e da seguridade viaria na Avenida de América
A actuación, cun orzamento de 182.900 euros, desenvolveuse tamén nas rúas
Fernández Flórez, Alfonso Castelao e Magallanes, na zona norte do centro urbano
Laura Moure/Melide
O Concello de Melide rematou as obras de mellora da pavimentación e da seguridade viaria na Avenida de América e nas rúas Fernández Flórez, Alfonso Castelao e Magallanes. A actuación abranguía un tramo total de 287 metros de lonxitude.
A intervención permite mellorar o funcionamento destas vías e reforzar a seguridade,
facilitando a convivencia entre o tránsito peonil e o tráfico rodado. Ao mesmo tempo,
contribúe á humanización e á mellora das condicións de mobilidade nunha zona
historicamente desatendida do norte do centro urbano.
O proxecto contemplou a reorganización do espazo das rúas mediante a creación dunha
plataforma única compartida por vehículos e peóns, elevada respecto dos viarios
anteriores. A diferenciación entre os distintos usos realízase a través dos materiais
empregados: a zona de circulación conta con pavimento de mestura asfáltica en quente,
as áreas de estacionamento execútanse con formigón desactivado e o espazo peonil con
baldosa granallada. As antigas beirarrúas foron demolidas para adaptarse a esta nova
configuración. A actuación incluíu tamén a instalación dun sistema de drenaxe para a
recollida e canalización das augas pluviais.
PUBLICIDADE
Esta intervención dá resposta á situación anterior destas rúas, que presentaban dous sentidos de circulación, beirarrúas a ambos lados e zonas de estacionamento sen
delimitar. Ademais, nalgúns puntos as beirarrúas non superaban os 90 centímetros de
ancho, o que dificultaba o paso e limitaba a accesibilidade, ao tempo que o pavimento
presentaba desgaste polo paso do tempo e por distintas intervencións de canalización de
servizos.
PUBLICIDADE
O alcalde de Melide, José Manuel Pérez, destaca a importancia destas obras e valorou o
resultado final como unha "gran mellora" para a contorna. Executouse ademais o aglomerado dun tramo da Rúa Galicia. A obra, cun orzamento de 182.900 euros, está incluída na segunda fase do POS+Adicional da Deputación da Coruña.
Comentarios