Melide executa obras de mellora da pavimentación e da seguridade viaria na Avenida de América

A actuación, licitada por 181.500 euros, desenvólvese tamén nas rúas Fernández Flórez, Alfonso Castelao e Magallanes, na zona norte do centro urbano

Laura Moure/Melide

O Concello de Melide está a executar obras de mellora da pavimentación e da seguridade viaria na Avenida de América e nas rúas Fernández Flórez, Alfonso Castelao e Magallanes. A actuación abrangue un tramo total de 287 metros de lonxitude.

A intervención permitirá mellorar o funcionamento destas vías e reforzar a seguridade,

facilitando a convivencia entre o tránsito peonil e o tráfico rodado. Ao mesmo tempo,

contribuirá á humanización e á mellora das condicións de mobilidade na zona norte do

centro urbano.

 PUBLICIDADE

Se queres obter máis información do evento preme na imaxe.

O proxecto contempla a reorganización do espazo das rúas mediante a creación dunha plataforma única compartida por vehículos e peóns, elevada respecto dos viarios actuais.

A diferenciación entre os distintos usos realizarase a través dos materiais empregados. A

zona destinada á circulación contará con pavimento de mestura asfáltica en quente,

mentres que as áreas de estacionamento executaranse con formigón desactivado e o

espazo peonil con baldosa granallada. As actuais beirarrúas serán demolidas para

adaptarse a esta nova configuración. A actuación inclúe a instalación dun sistema de

drenaxe para a recollida e canalización das augas pluviais.

Esta intervención dá resposta á situación actual destas rúas, que presentan dous sentidos

de circulación, beirarrúas a ambos lados e zonas de estacionamento sen delimitar. Ademais, nalgúns puntos as beirarrúas non superan os 90 centímetros de ancho, o que

dificulta o paso e limita a accesibilidade, ao tempo que o pavimento presenta desgaste

polo paso do tempo e por distintas intervencións de canalización de servizos.

 PUBLICIDADE

Preme para obter máis información.

A obra foi licitada por un importe de 181.500 euros e está incluída na segunda fase do

POS+ Adicional da Deputación da Coruña.