Melide acolle este venres e sábado a XI edición do Festival Motorock Milli Riders
- Laura Moure
- hace 8 minutos
- 2 min de lectura
O evento está organizado polo Motoclub Melide Milli Riders, asociación sen ánimo de lucro, e conta coa colaboración do Concello
Laura Moure/Melide
O alcalde de Melide, José Manuel Penas, e a concelleira de Deportes, Ana Mosteiro, participaron na presentación da XI edición do Festival Motorock Milli Riders, que se celebrará este venres 26 e sábado 27 de xuño no parque Rosalía de Castro.
O evento está organizado polo Motoclub Melide Milli Riders, asociación sen ánimo de
lucro, e conta coa colaboración do Concello de Melide. Trátase dunha cita xa consolidada
que reunirá afeccionados ao motociclismo, así como veciños e visitantes chegados de
distintos puntos de Galicia, Barcelona e Portugal. Desde a organización destacan a boa
resposta que adoita rexistrar o festival, cunha asistencia que sempre supera amplamente
o medio milleiro de persoas e que, nas edicións acompañadas polo bo tempo, chega a
incrementarse de maneira notable.
A programación dará comezo o venres coa actuación de DJ Maikstyle e unha sesión de
petiscos para os asistentes.
Xa o sábado desenvolverase a xornada principal, que incluirá a tradicional ruta libre con
saída ás once da mañá desde o parque Rosalía de Castro. O percorrido pasará por Vila
de Cruces, Portodemouros ata Arzúa, e durante o traxecto realizarase unha parada para
degustar unha lambiscada antes do regreso a Melide, previsto arredor das dúas do mediodía. Desde a organización destacan que nesta ruta pode participar calquera persoa
que o desexe, sen necesidade de estar inscrita.
PUBLICIDADE
Ao remate da ruta celebrarase un xantar, co polbo como protagonista, no parque Rosalía
de Castro. Por cuestións de aforo, esta actividade está limitada a entre 200 e 250 persoas. A inscrición completa ten un prezo de 50 euros, mentres que a modalidade media custa 35 euros. As persoas interesadas poden formalizar a súa participación no teléfono 681 254 860. A reserva poderá realizarse incluso o propio día do evento, sempre que queden prazas dispoñibles, aínda que a organización sinala que xa quedan moi poucas vacantes.
A programación da tarde do sábado incluirá actividades como xogos moteiros e outras
propostas pensadas para compartir horas de lecer. Durante toda a xornada tamén haberá animación musical con DJ.
PUBLICIDADE
A noite estará marcada pola celebración dunha paellada e dunha nova sesión musical,
culminando coa actuación do grupo Calle del Ruido nunha auténtica noite de rock.
Desde o Concello animan á veciñanza e aos afeccionados ás dúas rodas a participar nun
evento que volverá converter Melide nun referente do ambiente moteiro durante este fin
de semana.
Comentarios