Mañá arrancan as obras da Avenida do Parque, que obrigarán ao peche temporal da rúa Santa Eulalia

É unha das intervencións máis destacadas do proxecto de transformación urbana de Silleda

Laura Moure/Silleda

Mañá, luns,está previsto o comezo as obras de mellora da mobilidade peonil na Avenida do Parque, unha das intervencións máis destacadas do proxecto de transformación urbana de Silleda, financiada con case 600.000 euros a través do Plan Provincial Extraordinario da Deputación de Pontevedra e o programa Hurbe da Xunta de Galicia. Os traballos iniciaranse polo tramo da rúa Santa Eulalia, que permanecerá pechada ao tráfico rodado durante as primeiras semanas de execución.

Durante este tempo, o tráfico cara á rúa María Colmeiro quedará desviado pola rúa Pontevedra. Así mesmo, dende o Concello xa se comunicaron as restricións de circulación aos presidentes/as das comunidades de veciños da zona e ao CPR María Inmaculada, centro educativo situado nas inmediacións da obra. Tamén se colocaron na zona bandos informativos sobre a actuación.

As persoas residentes na rúa Santa Olaia poderán seguir accedendo aos seus garaxes a través da rúa María Colmeiro. Do mesmo xeito, quen viva nos edificios situados na zona posterior da igrexa terá acceso garantido dende a avenida do Parque, na área destinada ao servizo de taxis. Ademais, habilitarase un paso peonil que conectará a rúa Santa Olaia coa avenida do Parque polo espazo situado detrás da igrexa.

A alcaldesa e responsable municipal de Xestión Urbana, Paula Fernández Pena, explicou que “estes primeiros traballos se concentrarán no tramo de Santa Eulalia, precisamente para non interferir nos eventos previstos do Nadal, como a carreira de San Silvestre ou a cabalgata de Reis”.

Publicidade

Preme para contactar con nós e pregunta polas tarifas que son unha bicoca!

A actuación forma parte do proxecto “Mellora da mobilidade peonil na Avenida do Parque e entorno da Igrexa”, que suporá unha profunda renovación urbana deste espazo, incluíndo a creación de novas zonas verdes e peonís, o soterramento do cableado, melloras na iluminación pública e a revalorización da contorna da Igrexa de Silleda. Na zona de Santa Eulalia humanizarase o tramo dotandoo dunha estructura a modo de auditorio ao aire libre.

A intervención, cun orzamento global de 747.122,98 euros —dos que 597.698,38 euros son achegados pola Deputación de Pontevedra e o resto con fondos conseguidos a través do plan Hurbe da Xunta— forma parte do “cinturón verde de Silleda”, o proxecto estratéxico co que o goberno local aposta por un modelo de mobilidade amable, sostible e segura, que se vén desenvolvendo en distintas zonas do casco urbano.

Publicidade

Preme na imaxe se quere contactar connosco.

“Estamos ante unha obra clave para o futuro de Silleda, que mellorará a accesibilidade e a calidade de vida da veciñanza, convertendo esta avenida nun espazo máis moderno, verde e pensado para as persoas”, subliñou Fernández Pena.