María Manuela Colmeiro de Silleda celebra 101 anos rodeada da súa familia

Laura Moure/Silleda

O Concello de Silleda continúa celebrando a lonxevidade das súas veciñas e veciños. Onte foi a quenda de María Manuela Colmeiro Colmeiro, que o vindeiro luns, 24 de agosto, cumprirá 101 anos. A alcaldesa, Paula Fernández Pena, e a concelleira de Cultura, Mónica González, achegáronse este xoves ata o seu domicilio actual, na avenida do Parque, onde

Manuela reside xunto cunha das súas fillas, Marta, e a familia desta.

A homenaxeada estivo rodeada dos seus seres queridos nunha xornada especialmente emotiva, coa presenza dos seus catro fillos, Manuel, Consuelo, José e Marta.

 PUBLICIDADE

Preme na imaxe para obter máis información deste evento.

María Manuela naceu o 24 de agosto de 1925 en Andamollo, na parroquia de Manduas. Máis tarde trasladouse a Breixa, onde casou con Antonio Rey Otero e onde formaron a súa familia. Froito do matrimonio naceron os seus catro fillos.

Ao longo da súa vida, Manuela dedicouse fundamentalmente aos traballos do campo, nunha época marcada polo esforzo e polo traballo diario no rural. Onte, con algunhas limitacións de mobilidade propias da idade, segue gozando do agarimo e dos coidados da súa familia.

 PUBLICIDADE

Preme na imaxe para obter máis información do evento.

A familia medrou tamén con catro netas, Ana, Laura, Leyla e Icía, que completan unha vida familiar á que Manuela estivo sempre moi ligada.

A alcaldesa, Paula Fernández, destacou durante a visita que “é unha enorme alegría poder compartir estes momentos con persoas que representan a memoria viva do noso municipio”. “Detrás destes 101 anos hai toda unha vida de traballo, de familia e de experiencias que forman tamén parte da historia de Silleda”, sinalou.

 PUBLICIDADE

Preme na imaxe se queres contactar connosco.

Fernández quixo trasladarlle, en nome de toda a Corporación e da veciñanza, “os nosos parabéns e todo o noso agarimo”, facendo extensiva a felicitación á súa familia, “que hoxe tivo a sorte de poder reunirse arredor dela para celebrar unha cifra tan especial”.