Luis López anuncia unha nova partida para a conservación de firmes na rede viaria de Deza
- Laura Moure
- 19 jul
- 2 Min. de lectura
Laura Moure/Deza
A Xunta de Goberno da Deputación de Pontevedra acaba de aprobar a adxudicación dos contratos dos lotes do acordo marco de obras de conservación de firmes na rede viaria da Deputación que ascende a máis de 4,4 millóns de euros. O presidente provincial, Luis López, remarcou que "seguimos sumando recursos para a mellora das estradas provinciais, vías fundamentais na vertebración do noso territorio, para garantir que os 1.700 km destas infraestruturas estean en condicións axeitadas de seguridade e avanzar, así, na mellora da calidade de vida da nosa veciñanza".
Publicidade
En total, aprobáronse os 6 lotes que constitúen este acordo marco e que permiten dar servizo, tal e como detallou o presidente, a estradas provinciais de todos os concellos da provincia para afrontar diversas obras de reparación que permitirán mellorar a súa seguridade viaria. Así, 873.700 euros irán dirixidos aos concellos de Pontevedra, Vilaboa, A Lama, Cerdedo-Cotobade, Poio, Cangas do Morrazo, Moaña, Bueu, Redondela, Moraña e Campo Lameiro (lote 4) e outros máis de 873.200 euros ás vías provinciais de Silleda, A Estrada, Forcarei, Caldas de Reis e Cuntis (lote 2).
Publicidade
Ademais, investiranse 724.400 euros nas estradas provinciais ao seu paso polos concellos de Ponteareas, Salvaterra de Miño, As Neves, Mondariz, A Cañiza e Covelo (lote5); 685.000 euros nas vías da Deputación que atravesan os concellos de Vigo, Baiona, Gondomar, Salceda de Caselas, Redondela, Tui, Tomiño e O Rosal (lote 6); preto de 650.000 euros irán dirixidos a acometer melloras en estradas provinciais de Vila de Cruces, Agolada, Lalín, Rodeiro e Dozón (lote 1) e outros 636.300 euros a actuar nas vías de titularidade provincial de Barro, Poio, Caldas de Reis, Portas, Cambados, O Grove, Sanxenxo, Meaño, Meis, Ribadumia, Vilagarcía de Arousa, Vilanova de Arousa e A Illa de Arousa (lote 3).
Comentarios