Losada anuncia a formalización do último contrato para reparar firmes, entres eles na N-640 en Lalín

O investimento de 4,5 millóns de euros permitirá actuar en tramos da A-52, N-550, N-551, N-552, N-554, N-555, N-640 e PO-11

Laura Moure/Deza

O subdelegado do Goberno en Pontevedra, Abel Losada, anunciou a formalización dun novo contrato de emerxencia por importe de 4.455.187,84 euros para a reparación de firmes en distintos tramos da Rede de Estradas do Estado na provincia.

Os traballos permitirán actuar en máis de 200 quilómetros da Rede de Estradas do Estado.

Os traballos permitirán actuar en máis de 200 quilómetros da Rede de Estradas do Estado. En concreto, acometeranse melloras na A-52 ao seu paso polos concellos de A Cañiza, Arbo, As Neves, Salvaterra de Miño, Ponteareas, Mos e O Porriño; na N-120 entre A Cañiza e O Porriño; na N-550 entre Caldas de Reis e O Porriño, atravesando tamén os municipios de Portas, Barro, Pontevedra, Vilaboa, Redondela e Mos; na N-550A ao seu paso por Caldas de Reis; na N-551 na contorna de Tui; na N-552 en Redondela; na N-554 ao seu paso por Vilaboa; na N-555 entre Mos e Redondela; na N-640 na contorna de Lalín; e na PO-11, vía de conexión entre Pontevedra e o Porto de Marín.

As actuacións responden á necesidade de actuar con urxencia en diversas vías que experimentaron un notable deterioro nos últimos meses como consecuencia das intensas precipitacións rexistradas durante o inverno. O desgaste dos pavimentos e a aparición de danos no firme fixeron necesaria unha intervención extraordinaria para preservar a seguridade viaria e garantir unhas condicións adecuadas de circulación.

Abel Losada destacou que “o Goberno de España continúa avanzando na execución do plan extraordinario de mellora dos firmes da Rede de Estradas do Estado na provincia”. O subdelegado sinalou que “esta nova actuación permitirá continuar corrixindo os efectos do deterioro acumulado e reforzar a seguridade viaria en vías estratéxicas para a mobilidade de persoas e mercadorías”.

 PUBLICIDADE

Preme para obter máis información.

O contrato, formalizado coa empresa Construcciones, Obras y Viales, S.A. (COVSA), ascende a 4.455.187,84 euros, IVE incluído, e conta cun prazo de execución de catro meses.

Máis de 11,3 millóns de euros para reparar os danos causados polas choivas

Esta actuación completa o paquete de obras de emerxencia impulsado polo Ministerio de Transportes e Mobilidade Sostible tras constatar o grave deterioro que presentaban distintos tramos da Rede de Estradas do Estado na provincia tras o inverno. As intensas precipitacións rexistradas entre novembro de 2025 e febreiro de 2026 agravaron de forma moi significativa o estado dos firmes, provocando afundimentos, fendas, desprendementos e fochancas que chegaron a comprometer a seguridade viaria e obrigaron a acometer actuacións urxentes de reparación.

 PUBLICIDADE

Preme na imaxe e contacta con nós!

O novo contrato, por importe de 4,46 millóns de euros, súmase aos 6,9 millóns de euros xa adxudicados para actuar na A-55, VG-20, N-541, N-550, N-640 e N-525. En conxunto, o Goberno de España mobiliza máis de 11,3 millóns de euros para a mellora do firme das estradas estatais da provincia, completando así o programa extraordinario de emerxencia posto en marcha para recuperar as condicións de seguridade e circulación da rede viaria estatal en Pontevedra.

O subdelegado destacou ademais que estas actuacións forman parte dun esforzo máis amplo de recuperación e modernización da rede viaria estatal en Pontevedra. Neste sentido, lembrou que o Goberno de España está a mobilizar importantes investimentos para mellorar a seguridade, a conservación e a capacidade de servizo das principais vías de comunicación da provincia.