Investigado un condutor dun coche que se deu a fuga no Pino tras ter un accidente cun ciclista

Ecos da Comarca/O Pino

A Garda Civil investiga a un condutor como presunto autor dun delito contra a seguridade viaria por abandono do lugar do accidente, tras verse implicado nun sinistro viario cun ciclista que resultou ferido grave.

Os feitos ocorreron por mor da colisión dun turismo cun ciclista o pasado 6 de decembro de 2025, no quilómetro 86,800 da estrada N547, no termo municipal do Pino (A Coruña), causándolle ao ciclista feridas graves, abandonando o condutor o lugar do accidente tras o impacto.

A Garda Civil iniciou unha investigación, facéndose cargo da mesma o Equipo de Investigación de Sinistros (EIS) do Destacamento de Tráfico de Santiago de Compostela. Durante a inspección ocular do lugar, os axentes localizaron e interviñeron diversos restos do vehículo implicado, entre eles fragmentos dun retrovisor exterior e partes da defensa traseira, elementos que resultaron determinantes para orientar a liña de investigación. A análise técnica dos vestixios recuperados, xunto co estudo minucioso da información solicitada, conduciu aos gardas civís actuantes á localización do turismo implicado no sinistro.

 Publicidade

Preme para obter máis información.

A Garda Civil procedeu á investigación do condutor do mesmo como presunto autor dun delito de abandono do lugar do accidente. O delito de abandono do lugar do accidente está tipificado no artigo 382 bis do Código penal, conlevando penas de seis meses a catro anos e privación do dereito para conducir vehículos de motor e ciclomotores dun a catro anos cando o feito teña a súa orixe nunha acción imprudente ou prisión de tres a seis meses e privación do dereito para conducir de seis meses a dous anos cando se produza tras un feito fortuíto. O abandono do lugar do sinistro constitúe unha conduta especialmente grave desde o punto de vista penal e ético, ao deixar desamparada á vítima e dificultar o seu auxilio inmediato.

 PUBLICIDADE

Preme na imaxe para contactar con nós!

Recomendacións ante un sinistro viario

• A Garda Civil lembra que, en caso de verse implicado nun sinistro viario, é obrigatorio:  Deter o vehículo de forma inmediata e segura.

• Sinalizar adecuadamente o lugar para evitar novos riscos. 

• Auxiliar ás persoas feridas dentro das propias posibilidades. 

• Avisar sen demora aos servizos de emerxencia a través do 112. 

• Permanecer no lugar ata a chegada das Forzas e Corpos de Seguridade.

O cumprimento destas obrigacións non só é un deber legal, senón tamén unha responsabilidade moral cara aos demais usuarios da vía, especialmente os máis vulnerables. A Garda Civil reafirma o seu compromiso permanente coa seguridade viaria, a protección de ciclistas e peóns e a investigación rigorosa daquelas condutas que poñen en grave risco a vida e integridade das persoas nas estradas.