Garatuzas, a flote no Grove!: Unha xornada de convivencia interxeracional arredor do mar

Esta asociación cruceña reuniu a 30 nenos e as súas familias nunha actividade centrada no mar e no patrimonio mariñeiro

Laura Moure/Vila de Cruces

A Asociación Garatuzas de Vila de Cruces celebrou este domingo unha exitosa xornada de convivencia interxeracional no Grove, reunindo a 30 nenos e as súas familias nunha actividade centrada no mar e no patrimonio mariñeiro. Baixo o nome Garatuzas, a flote no Grove; esta iniciativa busca fomentar a unión familiar e o respecto pola contorna natural da costa de Pontevedra.

A xornada comezou no Colexio Cerdeiriñas de Piloño, coa presenza da deputada provincial Belén Cachafeiro, quen acompañou os participantes no inicio, entregándolles un agasallo da Deputación de Pontevedra. Dende alí, o grupo embarcouse nun día deseñado para explorar o universo mariño.

A primeira parada foi o Acuario do Grove, onde os participantes non só descubriron os

segredos da vida submarina, senón que tamén tiveron a oportunidade única de tocar

unha estrela de mar, creando un recordo inesquecible. A inmersión no mundo mariñeiro

continuou cun pracenteiro paseo en catamarán pola Ría de Arousa. Durante este

percorrido, os asistentes puideron admirar os fondos mariños grazas ás características do

barco, mentres degustaban deliciosos mexillóns frescos.

Publicidade

Preme na imaxe para obter máis información do evento.

Ademais, exploráronse espazos singulares como a enigmática Aldea dos Grobits na Illa

da Toxa, engadindo un toque de fantasía e aventura ao día. O día culminou cun

refrescante chapuzón, poñendo o broche de ouro a unha actividade chea de diversión e

aprendizaxe.

Esta xornada enmárcase na programación anual de Garatuzas, que inclúe diversas accións culturais e lúdicas. Un claro exemplo é a elaboración da carroza e a comparsa do Entroido con temática mariñeiro-pesqueira, todas elas deseñadas para reforzar o vínculo dos nenos co patrimonio cultural e natural ligado ao mar.

Publicidade

Preme na imaxe se queres contactar connosco.

A realización desta actividade foi posible grazas ao apoio e ao financiamento do programa +Convivencia da Deputación de Pontevedra, demostrando o compromiso de

ambas as entidades co fomento da convivencia interxeracional e o respecto polo medio ambiente.