Cárnicas Mosquera de Vila de Cruces recibe o selo artesanía alimentaria e selo de calidade

En concreto, concéndelle esta distinción ao seus chourizos e aos seus produtos salgados

Laura Moure/Vila de Cruces/Arzúa

Santiago de Compostela acolle ata mañá o segundo encontro de Galicia Etiqueta Calidade no Hotel Monumento San Francisco, que arrancou este mércores. Este acto, organizado pola Consellería do Medio Rural, pon en valor as producións galegas de calidade diferenciada, e entre elas das comarcas destaca Cárnicas Mosquera de Vila de Cruces, que tamén ten outra tenda en Arzúa.

Durante esta iniciativa presentouse a nova campaña de promoción de Ternera Gallega Suprema -que conta cun orzamento de 1,4 millóns de euros- para fomentar o consumo da carne de Ternera Gallega Suprema, á vez que se revaloriza este produto entre a poboación. Do mesmo xeito, promocionaranse en xeral os produtos galegos de calidade e, durante os tres días de mostra, están presentes diversas empresas expositoras de Artesanía Alimentaria e do Consello Regulador da Agricultura Ecolóxica de Galicia, así como outras relativas aos diferentes selos de calidade diferenciada.

Como indicamos liñas máis arriba, a empresa das comarcas Cárnicas Mosquera estivo este xoves presente porque os seus chourizos e produtos salgados lograron os selos de artesanía alimentaria e o de calidade.

Manolo Castro de Cárnicas Mosquera hoxe en Compostela.

Hoxe quixemos falar con esta firma para coñecer o que supón este logro:

1. Como recibistes a nova de que conseguistes esta distinción?

Pois a verdade sempre é unha alegría ver que o traballo, o traballo ben feito ten unha recompensa. Os nosos produtos, tanto os chourizos como o salgado, fanse de forma artesá como se fixeron sempre e agora vese recoñecido.

2. Isto que supón para un negocio como o voso que xa conta cunha importante traxectoria?

Supón darlle valor ó sacrificio d@s nosos artesáns que adican moitas horas e moito mimo aos nosos produtos.

3. Foi complicado lograr este recoñecemento?

Pois a verdade é que en canto a elaboración levamos cumprindo toda a vida, pero o difícil vén a nivel burocrático e administrativo. Pero dende logo volveríamos a pasar por este longo proceso de seis meses aproximadamente para acadalo.

4. Como definides estes chourizos?

A palabra que sempre os definiu pero agora con mais razón é artesan e de calidade. Son chourizos feitos como se fixeron sempre, afumados con leña de carballo e sobre todo moi coidados. Son un produto único.

Preme na imaxe se quere contactar connosco.

5. Considerades que a xente aposta cada vez máis por produtos de calidade?

Pois como sempre hai xente para todos os gustos, pero é certo que cada vez máis xente aposta polo produto de proximidade, polo produto de calidade e artesá.

6. Como foi o acto de Galicia Etiqueta Calidade?

O acto a verdade é que foi moi enriquecedor, compartimos momentos e conversas con diversos sectores que elaboran e que venden calidade. Rodearse de xente que sabe e valora o sacrificio sempre é enriquecedor.