Cruces e Touro organizan para o sábado 13 o roteiro “As dúas beiras do Ulla”, no marco do ‘Goza do Ulla’

A inscrición está aberta ata o mércores día 10, imprescindible para participar nesta iniciativa que disporá de monitores, autobús de volta ao punto de encontro e avituallamento

Laura Moure/Cruces/Touro

O programa ‘Goza do Ulla 2025’ chega a Vila de Cruces e Touro. Este vindeiro sábado, 13 de setembro, celebrarase o roteiro “As dúas beiras do Ulla”, organizado conxuntamente por ambos Concellos.

O Goza do Ulla en Vila de Cruces noutra edición.

O punto de encontro será a área recreativa de Remesquide, ás 9:15 horas. Os participantes poderán elixir entre dous percorridos, o curto ou o longo. Acompañados

por monitores, poderán facer a ruta curta de 12 quilómetros, desde a Illa de Remesquide ata a Ponte Basede, ou a ruta longa de 17 quilómetros, desde a Illa de Remesquide, pasando por Ponte Basede e ata Novefontes.

Ambas rutas pertencen ao mesmo percorrido, polo que o grupo transitará xunto polo mesmo camiño, sinxelamente que a curta rematará antes. Ao final de cada unha das rutas haberá un bus que recollerá aos participantes para levalos de novo a Remesquide onde se lles entregará unha bolsa de avituallamento.

Publicidade

Preme na imaxe para obter máis información do evento.

A ruta de sendeirismo é de carácter fluvial, tipo lineal e de dificultade media. Os participantes percorrerán durante catro horas a senda polas dúas marxes do río Ulla

nos concellos de Cruces e Touro. Ao longo do leito do Ulla, os participantes mergullaranse en bosques ribeiregos e gozarán da riqueza paisaxística que xorde ao redor da auga. A ruta ofrece fermosas paisaxes naturais como o Sobreiral do Ulla, un conxunto de sobreiras de 400 metros de lonxitude en Touro.

Publicidade

Preme na imaxe se queres contactar connosco.

As persoas interesadas en participar poderán inscribirse ata o mércores día 10 no teléfono 986 58 20 17 ou no correo noemi.lois@viladecruces.es  (inscrición obrigatoria).

O programa ‘Goza do Ulla’ naceu en 2011 para desfrutar do Ulla con rutas de sendeirismo programadas nos municipios bañados polo río, que recorre as provincias de Lugo, A Coruña e Pontevedra.