Cruces celebra o 25N cun manifesto, un contacontos e coa entrega de bolsas reivindicativas a alumnos
Laura Moure/Vila de Cruces
Como cada ano, dende 1999 moitas rúas tínguense de morado o día 25 de novembro pola conmemoración do Día Internacional da Eliminación da violencia contra as mulleres. O grupo de goberno de Vila de Cruces (Xuntos) xa deu a coñecer o seu habitual programa de actos con motivo do 25 N.
A programación cruceña de actividades de concienciación e divulgación acerca da violencia contra a muller levarase a cabo este 25 de novembro no auditorio da vila, onde terá lugar a lectura da Declaración Institucional polo “Día Internacional da eliminación da violencia contra a mulleres” a cargo de María Xosé Queizán ás 17:30 horas, continuando cunha sesión de contacontos para toda a familia titulado Contos en Lila realizado por Cris de Caldas.
Isto compleméntase coa entrega en todos os centros de ensino do Concello dunhas bolsas impresas coa frase gañadora do ano pasado QUERIDO MEDO DESPÍDOME DE TI NON CONTES MÁIS CONMIGO, unha frase que xogando coa súa colocación forman o número 016 de atención a muller.
