Comezan as obras de mellora exterior na escola infantil A Galiña Azul de Silleda

O Concello acometerá tamén a creación dun novo espacio de patio exterior para os mais pequenos

Laura Moure/Silleda

O Concello de Silleda vén de iniciar as obras de reposición da pintura exterior do edificio da Escola Infantil A Galiña Azul, situada na rúa da Estación nº 2. Os traballos desenvolveranse durante o mes de agosto, coincidindo co período no que o centro permanece parcialmente ocupado polo campamento de verán.

As actuacións inclúen a limpeza dos paramentos exteriores mediante hidrolimpadora, a retirada das capas de pintura deteriorada, a aplicación de fixador e o pintado con tres mans de pintura exterior, así como a reposición da pintura do peche perimetral que dá á Rúa da Estación.

O orzamento total da obra ascende a 6.491,13 euros (IVE incluído), e foi adxudicada á empresa Manuel Ángel Montoto Da Costa, mediante contrato menor. A actuación conta coa colaboración do Consorcio Galego de Servizos de Igualdade e Benestar, que compensará parte do custo na liquidación anual co Concello.

Publicidade

Preme na imaxe para obter máis información.

A concelleira de Educación, Ángela Troitiño, explica que “era unha actuación moi necesaria, tanto polo deterioro que presentaba a fachada como pola imaxe que ofrece un servizo público tan esencial como é a escola infantil”. Engade que “o obxectivo é que as instalacións estean en boas condicións antes do inicio do curso e que as crianzas poidan volver a un espazo máis coidado, acolledor e seguro”.

Novo patio para a Galiña Azul

Ademais, a rexedora informa que o Concello acometerá nas vindeiras semanas a construción dun novo muro separador para ampliar o patio exterior da escola infantil, unha obra que se executará tamén durante as vacacións escolares.

Publicidade

Preme na imaxe se queres contactar connosco.

Esta actuación será posible grazas ao acordo acadado entre o Concello, a Xunta de Galicia e o Consorcio, que permite que parte do patio do CEIP de Silleda pase a ser utilizado polo alumnado da Galiña Azul. Trátase dunha zona ata agora sen uso no patio escolar, que quedará dividida e acondicionada como espazo exterior para os máis pequenos.

Con esta intervención, o goberno local continúa mellorando os servizos educativos do municipio, reforzando espazos clave para a conciliación e o benestar das familias.