Comeza a formación práctica do programa Deza Circular na área fluvial de Cira
Laura Moure/Silleda
O programa Deza Circular, impulsado polo Concello de Silleda e que conta co apoio do veciño Concello de Vila de Cruces, iniciou este venres a formación práctica na área fluvial da parroquia silledense de Cira. Ademais de tarefas de limpeza e desbroce tamén se procederá á reposición de barandas de madeira danadas, entre outros traballos. O alumnado, baixo a dirección do personal docente, encargarase nas vindeiras xornadas da rexeneración deste espazo natural, incluido na rede Natura 2000.
Este programa, que botou a andar o pasado día 12 cunha vintena de alumnos e alumnas, ten como obxetivo capacitar e orientar a persoas desempregadas en servizos de aproveitamento forestal innovadores, así como accións destinadas a crear oportunidades no ámbito da economía forestal circular e o turismo sostible dos espazos naturais do municipio de Silleda.
Deza Circular foi un dos 66 seleccionados de toda España na liña de axudas de Emprega Verde, da Fundación Biodiversidade.
O ciclo, con sesións presenciais e tamén on-line continuará nesta fase ata o mes de novembro realizándose sesións prácticas en espazos naturais do municipio. O programa, totalmente de balde para o alumnado participante, conta cun orzamento de 78.336 euros e está financiado polo programa Emplea Verde, de Fundación Biodiversidade, co apoio do Ministerio para a Transición Ecolóxica e Reto Demográfico e cofinanciado polo Fondo Social Europeo.
Comentarios