Colexios de Arzúa, Agolada, Sobrado e Antas incorpóranse aos clubs de lectura

O programa da Xunta incorpora 51 novos centros para promover este hábito entre o alumnado de diferentes idades coa participación de toda a comunidade educativa

Laura Moure/Xeral

Un total de 500 centros educativos desenvolven este curso clubs de lectura co apoio da Xunta, o que supón un aumento de case o 10% tras a incorporación de 51 novos colexios e institutos. Esta iniciativa, enmarcada no Plan LÍA (Lectura, Información, Aprendizaxe) de bibliotecas escolares da Consellería de Educación, Ciencia, Universidades e FP, ten como obxectivo fomentar este hábito entre o alumnado de todas as idades, promovendo tamén a participación de outros membros da comunidade educativa como as familias nesta experiencia. Das comarcas de Arzúa, Deza, Terra de Melide e A Ulloa incorporaronse catro centros educativos.

Ademais, estimúlase o uso da radio e das novas tecnoloxías de comunicación e da información de forma natural nas súas actividades (blogs, vídeos, booktrailers, redes sociais, presentacións...), así como dos dispositivos dixitais de lectura. Poden participar no programa tanto os centros de Educación Infantil e Primaria como os de Secundaria, os colexios rurais agrupados, os de Educación Especial, os de FP, os centros de adultos e os centros de ensinanzas de réxime especial, (conservatorios e escolas de idiomas).

 Publicidade/DOAZÓN PARA ECOS DA COMARCA

Por provincias, 189 dos centros integrados no programa son da Coruña (24 de nova incorporación este curso), 70 de Lugo (seis novos), 57 de Ourense (tres novos) e 184 de Pontevedra (18 novos). A relación completa de centros participantes pode consultarse na resolución no Portal Educativo. Cada un deles ten asignada unha contía, en función do tipo de centro e do proposta presentada, para destinar fundamentalmente á adquisición de libros para as actividades do club, que pasarán posteriormente aos fondos da biblioteca escolar, así como para gastos derivados do funcionamento do club.

 Publicidade

Preme na imaxe para obter máis información.

Das comarcas incorpóranse a esta iniciativa:

COMARCA DE ARZÚA:

• CEIP de Arzúa

COMARCA DE DEZA:

• CEIP Plurilingüe de Agolada

COMARCA DE TERRA DE MELIDE:

• CEIP Plurilingüe Virxe do Portal de Sobrado dos Monxes

COMARCA DA ULLOA

• CEIP Plurilingüe de Antas de Ulla

Publicidade

Preme para contactar con nós e pregunta polas tarifas que son unha bicoca!

Bibliotecas solidarias

Algúns clubs de lectura establecen liñas de colaboración con bibliotecas públicas e entidades culturais do seu medio máis próximo, así como con centros de persoas maiores e outros espazos cidadáns. Neste eido, a Consellería de Educación promove tamén o programa Bibliotecas Escolares Solidarias, en colaboración coa Consellería de Cultura, Lingua e Xuventude. Este curso participan 245 centros educativos de Infantil, Primaria, Secundaria e ensinanzas de réxime especial, case un 5%.

Por provincias, participan 102 centros da Coruña, 28 de Lugo, 24 de Ourense e 91 de Pontevedra. A relación completa de centros pode consultarse no Portal Educativo.

A iniciativa busca estimular o voluntariado cultural nas bibliotecas e a lectura entre o alumnado. Para iso impúlsase tanto a colaboración dos estudantes no funcionamento da biblioteca como o desenvolvemento de lecturas compartidas, tanto dentro do centro como fóra (en outros colexios, nas residencias de maiores, nos hospitais...).