Chega unha nova edición de Arzúa Viva con actividades para toda a familia
O domingo 26 de xullo realizaranse xogos, actividades de lecer e actuacións dirixidas a público infantil e mozo
Laura Moure/Arzúa
O Departamento de Cultura do Concello de Arzúa dá a coñecer o programa de actividades para unha nova edición de Arzúa Viva, incluída na programación cultural de verán.
A Carballeira de Santa María, ubicada detrás do Pavillón polideportivo de O Cruceiro, acollerá este domingo, 26 de xullo, a 19ª edición con actividades de lecer e actuacións para público infantil e para a mocidade.
De 17:00 a 21:00 horas haberá instalados diversos inchables, obradoiros, xogos tradicionais de madeira e contarase con outras actividades recreativas como un fotomatón e un touro mecánico.
PUBLICIDADE
Ademais, a partir das seis da tarde terá lugar un espectáculo de monicreques. E como remate, a presente edición de Arzúa Viva pecharase cunha Festa da Escuma. A asistencia a todas as actividades é totalmente de balde e o acceso libre.
PUBLICIDADE
O concelleiro de cultura, José Luís García, anima “a todas as familias a participar nesta xornada pensada para o disfrute de todas e de todos con actividades que buscan o entretemento e pasalo ben, mais tamén a convivencia entre veciñas e veciños nun ambiente festivo e de lecer”.
Comentarios