Begoña Vázquez renuncia á súa acta de concelleira en Rodeiro "por motivos persoais e laborais"

A socialista, número dous da candidatura de José Luis Camiñas en 2023, deixa o grupo de goberno tras case tres anos e medio de mandato

Ecos da Comarca/Rodeiro

Begoña Vázquez López presentou o pasado venres a súa renuncia á acta de concelleira do PSOE no Concello de Rodeiro, así como ás responsabilidades que viña desempeñando no goberno municipal. A decisión responde, segundo trasladou, a motivos persoais e laborais.

Begoña Vázquez e José Luis Camiñas.

Vázquez ocupaba o número dous da candidatura socialista nas eleccións municipais de 2023 e formaba parte do goberno encabezado por José Luis Camiñas. Durante este mandato estivo á fronte das áreas de Servizos Sociais, Traballo e Urbanismo. A súa saída deberá ser ratificada nun pleno, momento no que se iniciará o procedemento para cubrir a vacante.

O alcalde agradece o seu traballo

Tras coñecerse a renuncia, o alcalde de Rodeiro, José Luis Camiñas, quixo dedicar unhas palabras públicas a Begoña Vázquez e agradecerlle o traballo realizado durante estes anos.

 PUBLICIDADE

Preme na imaxe para obter máis información.

Camiñas lembra que, cando comezou a preparar a candidatura para as eleccións de 2023, lle propuxo a Vázquez formar parte do proxecto. "A resposta foi si. Sempre estivo disposta", sinala o rexedor, que destaca que ocupou o número dous da lista e que ambos tiveron "por segunda vez" a oportunidade de gobernar Rodeiro xuntos.

O alcalde subliña que durante o mandato houbo "anos de moito traballo, de dificultades, de decisións e tamén de proxectos importantes para Rodeiro", e destaca a disposición de Vázquez para asumir responsabilidades e dedicar tempo ao servizo da veciñanza.

 PUBLICIDADE

Preme na imaxe para contactar connosco.

"Quero agradecerche, Begoña, os servizos prestados ao Concello de Rodeiro e, sobre todo, a túa disposición e compromiso durante todo este tempo", manifesta Camiñas.

O rexedor conclúe a súa mensaxe sinalando que "as responsabilidades políticas comezan e rematan, pero as persoas e os vínculos que se crean ao longo do camiño permanecen", antes de desexarlle "moita sorte nesta nova etapa persoal e profesional".