Laura MoureAvanzan a bo ritmo as obras de remodelación para o novo Consistorio de Silleda
O alcalde, Manuel Cuiña, visitou os traballos, que se están a centrar nas demolicións de edificios adxacentes do recinto
Laura Moure/Silleda
As obras de reforma para a nova Casa Consistorial de Silleda, que deron comezo o pasado mes de xullo, avanzan a bo ritmo. A reforma da que foi nas últimas décadas Casa da Cultura, sita entre a rúa Progreso e a rúa Morón, é unha das obras máis destacadas desta lexislatura, cun investimento para esta primeira fase por importe de 1.628.012,83 euros. A empresa adxudicataria é a UTE formada por Orega e Coviastec, que asumiu o proxecto cun prazo de realización dos traballos de 10 meses.
O alcalde de Silleda, Manuel Cuiña, supervisou este martes os traballos que avanzan a bo ritmo, centrándose agora na demolición de edificios anexos como o da biblioteca, traballos xa rematados. “Agardamos que se poidan cumprir os prazos estipulados e que a reforma
esté lista como se prevé en abril do vindeiro ano”, explica Cuiña. O traslado e centralización de todas as dependencias municipais vén a culminar un longo proceso que se iniciou en 2017 ca consulta popular á veciñanza, a fin de unificar todos os servizos logrando un maior aforro e operatividade da Administración Local.
Nesta primeira fase dos traballos, que contan ca aportación da Deputación de Pontevedra a través do programa Reacpon, cunha achega de 713.000 euros, e da Xunta de Galicia, con outros 250.000 euros, reformarase o interior do edificio que ocupa unha parcela de algo máis de 1.000 metros cadrados de superficie. Ademais da redistribución, mellora de servizos e instalacións, o edificio recuperará a súa fachada orixinal.
Nunha segunda fase está previsto acometer un novo edificio na parte traseira, onde tamén se construirá un aparcamento soterrado, con acceso dende a rúa Morón. Todos os servizos e dependencias municipais serán trasladados a esta nova e céntrica ubicación, logrando non só un maior aforro e eficiencia, senón tamén para maior comodidade da veciñanza.
