As competicións de atletismo e xadrez volverán a reunir aos seus afeccionados na Semana Verde

Terán lugar na Feira Internacional Abanca Semana Verde de Galicia de Silleda, a cal celebrará a súa 47ª edición entre os días 5 e 8 de xuño

Laura Moure/Silleda

A Feira Internacional Abanca Semana Verde de Galicia, a cal celebrará a súa 47ª edición entre os días 5 e 8 de xuño en Silleda, acollerá de novo as súas competicións de atletismo e xadrez, as cales xa se converteron nun clásico do certame con gran acollida entre os afeccionados destas disciplinas. Así, acollerá a X Carreira Popular Abanca Semana Verde de Galicia, organizada pola entidade feiral xunto coa Federación Galega de Atletismo e co patrocinio de Abanca e a colaboración de Decathlon.

A proba dará comezo ás 20:00 horas do 6 de xuño, incluíndo o seu percorrido unha pequena parte no recinto e o resto en zonas exteriores próximas ao mesmo. Establece dúas categorías, Escolar, que inclúe Pitufos, Sub 10, Sub 12, Sub 14, Sub 16 e Sub 18; e Absoluta, con Sub 20, Sub 23, Senior, Máster A, Máster B, Máster C e Máster D. Os atletas, que poden ser federados ou non, deben inscribirse ata o 4 de xuño en www.carreirasgalegas.com O custo é de 5€ para a categoría Absoluta e gratuíta para as Escolares.

Por outra banda, o Open de Xadrez Abanca Semana Verde de Galicia, levará a cabo a súa sexta edición. Será o domingo 8 de xuño e contará con cinco categorías distintas, as cales serán totalmente independentes e corresponderanse con Sub 8, Sub 10, Sub 12, Sub 14 e Absoluta. Como xa é habitual, xogarase con sistema suízo a 8 roldas mediante programa informático homologado pola Federación Internacional (4 en sesión matutina e 4 de tarde), co cal ningún xogador quedará nunca eliminado, enfrontándose en cada rolda os xogadores da mesma puntuación. Contará cun total de 2.000€ en premios e na categoría Absoluta será de novo puntuable para a clasificación internacional Elo FIDE.

Publicidade

Preme na imaxe se queres contactar connosco.

Os interesados en participar no torneo poden inscribirse no formulario oficial do

evento, o cal figura en www.semanaverde.es/bases_Open_Xadrez.pdf  Poderán facelo ata o día 6 de xuño ás 20.00 horas, sendo gratuíto tanto para participantes ata 16 anos como participantes con puntuación a partir de 2.200 Elo e cun custo de 10€ para maiores de 16 anos que non conten con esa puntuación.

Citas consolidadas

A Carreria Popular Abanca Semana Verde de Galicia é xa cita obrigada para multitude de persoas de toda a Comunidade, inscribíndose na pasada edición preto de 200.

En canto ao Open de Xadrez, é un evento marcado no calendario de gran cantidade de xadrecistas, tamén de Grandes Mestres, participando noutras ocasións o serbio Aleksa Strikovic, o español Gabriel del Río, o uzbeko Ibrahim Khamrakulov, o búlgaro Vladimir Petkov, o cubano Arián González ou o galego David Lariño. Para esta edición a organización está a ultimar a inscrición de varios Grandes Mestres e Mestres Internacionais, as cales se pecharán nos próximos días.