Arzúa adxudica a mellora de dúas pistas en Burres e A Castañeda
As obras, cun orzamento de mais de 68.000 € renovarán o firme de 950 metros na conexión entre a AC-240 e a N-547 e no camiño da Pena a Faraldo, con actuacións de drenaxe e nova sinalización
Laura Moure/Arzúa
O Concello de Arzúa adxudicou por 68.887,72 euros, IVE incluído, as obras de mellora de dous viarios nas parroquias de Burres e A Castañeda. A intervención permitirá reparar o pavimento e mellorar as condicións de circulación na vía que conecta a AC-240 coa N-547, en Burres, e no camiño da Pena a Faraldo, na Castañeda.
O proxecto abrangue un total de 950 metros e combina a renovación do firme coa mellora da evacuación das augas e da sinalización. Os traballos atenderán tanto a superficie pola que circulan os vehículos como as zonas deterioradas dos bordos da calzada, co obxectivo de facilitar os desprazamentos da veciñanza e conservar os accesos ás parroquias.
PUBLICIDADE
En Burres actuarase sobre dous treitos de 70 e 530 metros, ademais das zonas de acceso e dos puntos onde se amplía a calzada. Tras reparar as fochancas, estenderase unha capa de seis centímetros de aglomerado en quente.
Na Castañeda, a mellora do camiño da Pena a Faraldo cubrirá 350 metros de lonxitude. Neste caso, o proxecto prevé reparar as fochancas e os bordos deteriorados antes de aplicar unha nova capa de aglomerado de cinco centímetros de grosor. A actuación incluirá tamén as zonas de acceso ao viario.
PUBLICIDADE
Ambas as intervencións completaranse coa apertura de gabias e a limpeza dos pasos de auga para facilitar a drenaxe e evitar que a acumulación de auga deteriore o pavimento. Por último, pintaranse as liñas de bordo e os símbolos viarios previstos no proxecto.
Comentarios