Arzúa abordará hoxe en pleno a reforma da rúa Nova, os festivos locais e o futuro de Portodemouros

Ecos da Comarca/Arzúa

O Concello de Arzúa celebrará hoxe, xoves 31 de xullo, ás 20:0 horas, unha sesión plenaria ordinaria que incluirá temas de relevancia para a planificación municipal, o tecido económico local e os servizos públicos. A sesión terá lugar no salón de plenos da Casa Consistorial e será aberta ao público, podendo seguirse tamén en directo a través da radio municipal.

Na orde do día figura a aprobación do modificado do proxecto de humanización da rúa Nova. A obra está incluída no Plan Único POS+ da Deputación da Coruña.

Outro dos puntos destacados será a dación de conta do decreto de aprobación do convenio entre o Concello e Naturgy para a cesión dos terreos e instalacións de Portodemouros, que permitirá iniciar a recuperación deste espazo como área de lecer, deportiva e ambiental. A iniciativa conta cun marcado carácter estratéxico para o desenvolvemento turístico e económico da zona.

Publicidade

Preme na imaxe para obter máis información.

Tamén se someterá a debate a modificación da ordenanza que regula os prezos públicos das actividades deportivas e recreativas.

En clave de promoción económica, o pleno valorará dúas propostas para declarar de especial interese ou utilidade municipal as obras de ampliación de explotacións gandeiras de leite, a cargo das entidades Pérez Vilar SL e Granza de Andrea SC, unha medida que pode supoñer bonificacións fiscais e un apoio ao sector primario local.

A corporación votará ademais a proposta de festivos locais para o ano 2026, un trámite anual que require aprobación plenaria.

Publicidade

Preme na imaxe para obter máis información do evento.

No apartado político, someteranse a debate dúas mocións presentadas polos grupos da corporación. O Partido Popular defenderá unha iniciativa para esixir “transparencia, depuración de responsabilidades e convocatoria urxente de eleccións xerais” ante a situación política estatal. Pola súa parte, o BNG presentará unha moción para reclamar á Xunta de Galicia unha intervención urxente nas instalacións do CEIP de Arzúa, denunciando deficiencias estruturais.

A sesión finalizará co apartado de rogos e preguntas, e a habitual dación de conta dos decretos asinados pola Alcaldía.