Amarai crea unha liña de merchandising como apoio aos seus proxectos sociais

A iniciativa busca dar visibilidade e participación das persoas con discapacidade

Laura Moure/C.Arzúa/T.de Melide

A Asociación Amarai (Asociación de Persoas con Discapacidade e Apoio á Integración das Comarcas de Arzúa e Terra de Melide) presenta o seu segundo produto de merchandising, unha nova iniciativa coa que a entidade continúa apostando pola inclusión social e pola visibilización do traballo que desenvolve con persoas con discapacidade.

 Publicidade/DOAZÓN PARA ECOS DA COMARCA

Este novo lanzamento forma parte da estratexia da asociación para reforzar a súa sustentabilidade e dar a coñecer os seus proxectos, ao tempo que promove valores como a diversidade, a participación e o compromiso social. O merchandising convértese así nunha ferramenta non só de financiamento, senón tamén de sensibilización da sociedade.

O primeiro produto trátase dun bolígrafo coa imaxe dun astronauta en silla de rodas na lúa coa frase “Xa temos chegado máis lonxe”, para facer referencia a que o ser humano foi quen de viaxar ao espazo e aínda temos que pelexar para conseguir unha igualdade de dereitos que, aparentemente, debería ser moito máis sinxelo que argallar toda a artillería aeroespacial.

O segundo é unha pulseira que fai referencia a que todos deberíamos ter as mesmas oportunidades, a través da frase “Ou todxs ou ninguén”, co fin de crear unha sociedade

na que todos/as teñamos cabida, na que ninguén quede atrás.

 Publicidade

Preme na imaxe para obter máis información.

Desde Amarai destacan que este segundo produto supón un paso máis na consolidación da iniciativa, tras a boa acollida do primeiro artigo lanzado pola entidade. Ademais, o proxecto busca implicar á comunidade e facer partícipes ás persoas usuarias da asociación, favorecendo a súa visibilidade e recoñecemento social.

Os fondos recadados coa venda deste novo produto destinaranse a apoiar os programas e actividades que Amarai desenvolve no seu traballo diario con persoas con discapacidade, contribuíndo á mellora da súa calidade de vida e á construción dunha

sociedade máis xusta e inclusiva. Pódense mercar a través das súas redes sociais

(@crdamarai ou Amarai Asociación), na súa páxina web ou no 630 785 859.

Publicidade

Preme para contactar con nós e pregunta polas tarifas que son unha bicoca!

Con este lanzamento, a Asociación Amarai reafirma o seu compromiso cun modelo

social baseado na igualdade de oportunidades e na participación activa de todas as

persoas.