Allegue visita en Lalín un dos 23 centros que traballan no Plan de Vialidade Invernal da Xunta

O plan está operativo xa desde principios deste mes de novembro e manterase ata o vindeiro 30 de abril

Laura Moure/Lalín

A Xunta xa ten en marcha o Plan de Vialidade Invernal 2025-2026, cun operativo que implica a máis de 350 traballadores e a disposición de 5.190 toneladas de fundente s. A conselleira de Vivenda e Planificación de Infraestruturas, María M. Allegue, visitou este xoves en Lalín un dos 23 centros desde os que a Administración autonómica desprega este operativo nas catro provincias.

Cos citados medios, aos que se une un dispositivo dun total de 200 vehículos e maquinaria, a Administración autonómica busca facilitar os desprazamentos en condicións máis seguras ante a meteoroloxía adversa que se prevé dende agora ata os vindeiros meses.

Deste xeito, o operativo está despregado xa desde principios de mes nas provincias de Lugo e Ourense e desde o pasado día 15 nas de A Coruña e Pontevedra e prolongarase ata o 30 de abril. Foi necesario xa a mediados de mes o esparexemento de máis de 25 toneladas de sal e 4.000 litros de salmoira, a práctica totalidade en estradas de Lugo.

A conselleira destacou o operativo para coordinar as actuacións e medios materiais e humanos con fin de garantir a vialidade das estradas e subliñou que a Xunta ten identificadas en Galicia as vías máis susceptibles de ter problemas por neve, ao redor de 820 quilómetros dos 5.500 con que conta a rede viaria autonómica.

Allegue subliñou que nesta aposta para blindar a seguridade a Xunta vén de adxudicar os 8 contratos para garantir nos vindeiros 4 anos a conservación ordinaria e vialidade das estradas autonómicas, ademais da revisión das estruturas e obras de paso nas catro provincias, por preto de 150M€, cun incremento do 37% con respecto ao anterior contrato. As tarefas incluirán por vez primeira esta conservación nas catro autovías galegas de peaxe en sombra rescatadas pola Xunta, a AG-11 (Barbanza), a AG-31 (Celanova), a AG-41 (O Salnés) e a AG-56 (Santiago-Brión).

Máis en detalle, o plan de vialidade invernal establece as medidas preventivas para anticiparse aos contratempos que se poidan producir, tendo en conta que as choivas, a formación de placas de xeo ou a aparición de neve son elementos habituais nesta época en Galicia. Tamén garante medidas curativas para reforzar a seguridade viaria en situacións nas meteorolóxicas desfavorables.

 Publicidade

Preme na imaxe para obter máis información.

As 5.190 toneladas de fundentes disponse en 23 puntos de acopios, 25 silos  e 13 plantas de preparación de salmoira distribuídos estratexicamente para actuar se é necesario.

Mantense unha vixilancia constante das previsións meteorolóxicas a través dos servizos oficiais. E realízanse percorridos diarios de control polas estradas, que permiten detectar con rapidez calquera incidencia. Neste seguimento participan a Garda Civil de Tráfico e Protección Civil, persoal da Xunta, das empresas conservadoras e a propia cidadanía, que pode comunicar problemas a través do 112.

O obxectivo é vixiar e atender as 24 horas as incidencias que se poidan producir nas vías autonómicas por condicións climatolóxicas adversas e tratar de reducir as afeccións ao tráfico nas estradas.

Publicidade

Preme para contactar con nós e pregunta polas tarifas que son unha bicoca!

Realízanse tarefas preventivas, destinadas a evitar no posible a formación e neve ou xeo, co esparexemento de fundentes. E procederase á súa retirada con maquinaria especializada xunto á extensión de fundentes cando se detecte neve na calzada.