Alba Forno acusa a José Crespo de poñer en risco a recuperación do antigo ambulatorio de Lalín

Pide ao alcalde que "abandone a confrontación, negocie unha solución coa Seguridade Social e garanta que Lalín poida aproveitar o espazo para novos equipamentos públicos, como unha escola infantil municipal"

Ecos da Comarca/Lalín

A candidata á Alcaldía de Lalín, Alba Forno, acusou ao alcalde, José Crespo, "de ter posto en risco a recuperación do antigo ambulatorio por priorizar durante anos a confrontación política coa oposición e co Goberno de España fronte á xestión e á procura de solucións". Forno considera especialmente grave que se chegase a unha situación que podería facer irrecuperable o edificio, cando os problemas de conservación eran coñecidos desde hai moitos anos. Nesta liña, lembra que o propio PSOE propuxera xa en marzo de 2023 iniciar os trámites para garantir a súa recuperación unha vez que os servizos sanitarios se trasladasen ao novo Centro Integral de Saúde, "desprezando Crespo esta proposta para un ano despois facela súa".

Visita de socialistas ao antigo ambulatorio. (Foto de arquivo).

“Nós propuxemos empezar a traballar con tempo para que o edificio non quedase abandonado, pero Crespo ridiculizou a nosa iniciativa, asegurou que non se podía facer e votou en contra. Poucos meses despois acabou anunciando que estaba negociando co Estado precisamente para conseguir o que nós lle pediramos”, lembra Forno. Para a candidata “hoxe o problema xa non é que Crespo teña que recoñecer que o PSOE tiña razón, o problema é que deixáronse pasar anos de cando o ambulatorio aínda estaba en condicións aceptables e agora podemos atoparnos con que xa non quede edificio que recuperar”, incide.

Alba Forno reclama á Xunta de Galicia que asuma a súa responsabilidade polo estado do antigo ambulatorio "ao que non lle prestou o mantemento necesario". Considera "inadmisible que a administración autonómica pretenda devolver un inmoble con graves problemas estruturais sen asumir ningunha consecuencia da súa falta de conservación".

  PUBLICIDADE

Preme na imaxe para obter máis información do evento.

Unha solución realista

A voceira socialista reclama ao goberno municipal que abandone a confrontación política e aborde con seriedade o futuro do antigo ambulatorio, comezando por determinar mediante unha avaliación técnica rigorosa, se o edificio é recuperable e cal sería o custo real da súa rehabilitación. “O primeiro que temos que  saber é en que situación estamos, se o edificio se pode recuperar ou non, determinar nese caso canto custa e quen debe asumir ese investimento”, sinala. “Pero se o seu deterioro é tan grave que resulta máis económico derrubalo que rehabilitalo, tamén temos que ser capaces de tomar esa decisión, o que non podemos é seguir perdendo o tempo mentres o edificio cae", afirma.

Neste sentido, a voceira socialista pídelelle a Crespo que valore seriamente a proposta trasladada pola Tesouraría Xeral da Seguridade Social para desbloquear o futuro do inmoble e que negocie coa Xunta unha solución que permita resolver os problemas derivados da falta de mantemento, sen trasladar automaticamente os seus custos a outra administración.

  PUBLICIDADE

Preme na imaxe para obter máis información.

Forno sinala que, mesmo no escenario de que a demolición resulte a alternativa máis razoable, o Concello debe estudar as fórmulas máis adecuadas que permitan que Lalín dispoña dese terreo para construír novos equipamentos públicos. “Se finalmente hai que derrubar o ambulatorio, o importante é que Lalín non perda tamén ese espazo. Temos que pensar no futuro e nas necesidades da veciñanza, non seguir atrapados nunha discusión entre administracións", explica.

Entre os posibles usos, a socialista apuntoa á construción dunha escola infantil municipal, unha proposta que o PSOE leva anos defendendo para ampliar as prazas públicas e facilitar a conciliación das familias lalinenses.