Silleda prepara unha homenaxe a José Maril e propón o seu nomeamento como Fillo Predilecto do concello
Unha comisión organizadora leva meses traballando nos preparativos do recoñecemento, que se celebrará o 16 de xaneiro de 2027 no recinto feiral
Laura Moure/Silleda
Silleda renderá homenaxe a José Maril Sánchez o vindeiro 16 de xaneiro de 2027, nun acto de recoñecemento á súa traxectoria e á súa decisiva contribución á creación, impulso e consolidación da Semana Verde de Galicia. No marco desta homenaxe, o Concello de Silleda promoverá tamén o seu nomeamento como Fillo Predilecto do municipio, unha distinción coa que se pretende poñer en valor o seu legado e a súa estreita vinculación coa historia recente da localidade.
A homenaxe ten a súa orixe nunha iniciativa cidadá que puxo de manifesto a vontade de recoñecer publicamente o labor desenvolvido por Maril Sánchez á fronte da institución feiral. Desde os primeiros pasos, esta proposta contou coa implicación do Concello de Silleda e da Fundación Semana Verde de Galicia, dando lugar á constitución dunha comisión organizadora que leva varios meses traballando conxuntamente na preparación do recoñecemento.
Deste xeito, a homenaxe nace como un proxecto compartido, no que conflúen a iniciativa cidadá e o compromiso institucional de recoñecer a unha persoa cuxa traxectoria está profundamente ligada ao desenvolvemento económico, social e á proxección exterior de Silleda.
A alcaldesa, Paula Fernández Pena, destaca precisamente ese carácter colectivo da iniciativa. "O recoñecemento a José Maril nace dunha vontade compartida de agradecerlle todo o que fixo pola Semana Verde e por Silleda. Desde o primeiro momento entendemos que esta homenaxe merecía todo o apoio e a implicación do Concello, porque estamos a falar dunha figura fundamental para comprender a historia recente do noso municipio", sinala.
Neste contexto, a rexedora propón que o recoñecemento teña tamén carácter institucional mediante a concesión do título de Fillo Predilecto, unha das distincións honoríficas que pode outorgar o Concello a persoas que destacaron pola súa contribución ao municipio. "Queremos que esta homenaxe estea á altura do legado de José Maril e que Silleda poida expresar, tamén a través das súas institucións, o agradecemento a unha persoa que contribuíu de maneira decisiva a facer da Semana Verde un referente dentro e fóra de Galicia", engade Paula Fernández.
PUBLICIDADE
Unha comisión que leva meses traballando na homenaxe
A comisión organizadora, constituída para coordinar os preparativos, está integrada pola alcaldesa de Silleda, Paula Fernández Pena; unha técnica municipal; o director da Fundación Semana Verde de Galicia, Ricardo Durán; e traballadores e extraballadores da entidade feiral.
Durante os últimos meses, este grupo vén mantendo distintas reunións para avanzar na organización dun acto que pretende recoñecer a traxectoria de Maril Sánchez e poñer en valor a súa contribución a un dos proxectos máis importantes da historia contemporánea de Silleda.
A homenaxe celebrarase o 16 de xaneiro de 2027 nas instalacións da Fundación Semana Verde de Galicia, un escenario especialmente significativo pola súa estreita vinculación coa vida e co labor profesional do homenaxeado.
Unha figura fundamental na historia da Semana Verde
José Maril Sánchez foi unha das figuras clave na posta en marcha da Semana Verde de Galicia e estivo á fronte da súa Fundación desde a creación da entidade, en 1991, ata o ano 2008.
O seu traballo resultou determinante para impulsar e consolidar o certame feiral e para contribuír ao desenvolvemento dun recinto que co paso dos anos se converteu nunha infraestrutura estratéxica para a promoción dos sectores agrario, gandeiro, alimentario, industrial e comercial.
A Semana Verde representa un dos grandes sinais de identidade de Silleda, ademais dun importante motor de actividade económica, promoción empresarial e dinamización do territorio. A súa evolución e consolidación contribuíron a situar o municipio no mapa dos grandes eventos feirais de Galicia.
PUBLICIDADE
Neste sentido, a alcaldesa destaca que "falar de José Maril é falar da Semana Verde, pero tamén dunha parte fundamental da transformación de Silleda nas últimas décadas. O seu traballo deixou unha pegada que vai moito máis alá do recinto feiral e que forma parte da memoria colectiva do noso municipio".
Como parte deste recoñecemento, a alcaldesa de Silleda promoverá a concesión do título de Fillo Predilecto a José Maril Sánchez, proposta que deberá ser sometida á consideración do Pleno, e que xa foi comunicada a todos os grupos da Corporación municipal. Con esta distinción, o Concello pretende expresar formalmente o agradecemento de Silleda a unha persoa cuxa dedicación e compromiso coa Semana Verde contribuíron de maneira decisiva ao desenvolvemento e á proxección do municipio.
A homenaxe do vindeiro mes de xaneiro será así unha oportunidade para recoñecer publicamente o legado de José Maril Sánchez e poñer en valor unha traxectoria que forma parte inseparable da historia de Silleda.
Comentarios