Adega reivindica en Lalín 50 anos de loita ecoloxista coa súa exposición ao aire libre

A mostra poderá verse na Praza do Concello ata o 5 de maio

Laura Moure/Lalín

A Asociación para a Defensa Ecolóxica de Galiza (ADEGA) inaugurou onte en Lalín a súa exposición "50 anos coidando a terra", que permanecerá na Praza do Concello (diante da Biblioteca Municipal) ata o vindeiro martes, 5 de maio. Esta mostra itinerante repasa, por medio de relatos e imaxes históricas, algúns dos fitos e mobilizacións ecoloxistas que máis pegada deixaron no país e que influíron de maneira máis acusada no presente e no noso devir futuro. Logo de recalar por diferentes concellos de Galicia, como Carballo, Muros, Arzúa, Valdoviño, Lugo, A Coruña, Ourense ou Santiago, a exposición fai parada agora en Lalín. A súa chegada a esta vila quere poñer en valor as loitas ambientais que ten librado a comarca de Deza e as súas poboacións fronte a numerosos episodios de espolio do noso territorio ao longo destes 50 anos.

ADEGA, moi presente na comarca

Marcial Barral, membro da directiva de ADEGA e veciño da comarca do Deza, foi o encargado de conducir o acto de presentación. Agradeceu a presenza do técnico de Medio Ambiente do Concello de Lalín, Xosé Manuel Méndez García; así como a participación de distintas asociacións e colectivos ambientais como o Proxecto Rexenerativo Deza e a Plataforma Stop Biometano Deza.Tamén recoñeceu a asistencia de representantes institucionais como Celia Alonso do PSdG en Lalín, e Ariadna Fernández, deputada do BNG no Parlamento galego.

Durante a súa intervención, Barral Barral puxo o foco no 50 aniversario do nacemento de Adega, unha asociación que, salientou, leva décadas "moi presente na comarca apoiando e promovendo actos reivindicativos en defensa do medio ambiente". Fixo un repaso por algunhas das principais loitas ambientais, como a oposición aos encoros no Ulla e á incineradora do Irixo ou a defensa das fragas de Catasós, así como polas ameazas máis actuais, en relación ao proxecto de Altri e as plantas de biometano ou biogás, cuxos impactos explicou Daniel López Vispo.

 PUBLICIDADE

Se queres obter máis información do evento preme na imaxe.

Así mesmo, destacou as colaboracións con dous dos proxectos máis emblemáticos da asociación: o Proxecto Ríos, mediante actuacións no Arnego, no Deza e no Ulla; e o Proxecto Cerna, a través da emisión do programa “Radio Cerna” na radio local de Lalín. Tamén puxo en valor as iniciativas de custodia do territorio impulsadas nos sobreirais do Arnego e na Eira da Xoana, onde se levan a cabo actividades como a recuperación de saberes e oficios tradicionais.

Pola súa banda, o técnico de Medio Ambiente do Concello de Lalín, Xosé Manuel Méndez García, tamén tomou a palabra para poñer en valor algúns dos proxectos de Educación Ambiental que ADEGA ten desenvolto no concello nos últimos anos, como o Proxecto Ríos e o programa de compostaxe caseira na parroquia lalinense de Goiás, e animou a ADEGA a continuar traballando pola defensa da terra.

O acto estivo amenizado polo grupo de gaitas Bico da Balouta, que puxo música ao comezo e ao peche dunha xornada na que tamén se recolleron sinaturas a prol do arquivo definitivo do proxecto de Altri e da Mina de Touro-O Pino. Finalmente, a secretaria executiva de ADEGA, Belén Rodríguez, ofreceu unha visita guiada pola mostra para todas as presentes.

 PUBLICIDADE

Preme para obter máis información.

50 anos coidando a terra

A exposición ao aire libre estrutúrase en 16 paneis distribuídos en catro tótems cúbicos, acompañados de bidóns simbólicos que recrean materiais radioactivos, en referencia á oposición galega aos vertidos nucleares na Fosa Atlántica, unha das mobilizacións ecoloxistas máis emblemáticas do país. 

A través de textos e imaxes, a mostra ofrece un percorrido pola historia da organización e polas principais ameazas ambientais ás que se enfrontou Galicia nos últimos 50 anos, desde a loita contra as verteduras contaminantes e os incendios forestais ata a defensa do territorio fronte á especulación e os macroproxectos industriais.Esta mostra ten como obxectivo conmemorar o 50 aniversario de ADEGA, promover a educación ambiental e incentivar o compromiso das novas xeracións coa defensa da terra e dun futuro sustentable para Galicia.