Adega mobilizou máis de 1.400 persoas pola conservación dos ríos nos tres anos de Fluviatilis

Desenvolveu actuacións para o control de especies invasoras e a restauración ecolóxica en cinco ríos galegos —Arnego, Bibei, Limia, Tambre e Tea— a través da custodia fluvial

Laura Moure/Agolada

A asociación ecoloxista ADEGA vén de presentar o balance final do Proxecto Fluviatilis: Custodia para a Resiliencia, no que participou xunto con outras catro entidades conservacionistas do Estado - Limne (Valencia), Anse (Murcia), Grup de Natura Freixe (Catalunya) e Red Cambera (Cantabria) - e que foi financiado pola Fundación Biodiversidad a través das axudas de Bioeconomía dos fondos Next Generation. Ao longo de tres anos e medio de traballo, ADEGA desenvolveu actuacións para o control de especies invasoras e a restauración ecolóxica en cinco ríos galegos —Arnego, Bibei, Limia, Tambre e Tea— a través da custodia fluvial, unha ferramenta de conservación que procura involucrar os diferentes actores na xestión dos ecosistemas fluviais.

Xornada de clausura

O venres, 21 de novembro, as cinco organizacións involucradas no proxecto celebraron en Santiago de Compostela a xornada de clausura de Fluviatilis, onde se presentaron os principais resultados e logros alcanzados ao longo deste tempo. O proxecto permitiu abordar unha análise detallada da calidade ecolóxica dos ríos, así como elaborar unha guía metodolóxica con criterios comúns para a restauración fluvial e modelos de gobernanza participada, froito do traballo conxunto das entidades participantes [pode consultarse aquí]. 

 Publicidade

Preme na imaxe para obter máis información.

A asociación ecoloxista destaca a participación de máis de 1.400 persoas en actividades de voluntariado, bioblitzs, xornadas formativas, exposicións e accións en centros educativos. A implicación da sociedade confirma, segundo ADEGA, “a crecente sensibilidade social pola saúde dos nosos ríos e a necesidade de coidar estes ecosistemas fronte ás múltiples ameazas que sofren”. No marco do proxecto, ADEGA reforzou os instrumentos de custodia fluvial, coa renovación do acordo existente coa Confederación Hidrográfica Miño-Sil e coa sinatura doutros tres novos convenios: dous con propietarios privados no río Arnego e outro co Concello de Ames no río Tambre. Estes acordos de custodia permiten á asociación ampliar a protección efectiva de varios treitos de alto valor ecolóxico. Ao tempo, ADEGA tamén firmou un convenio de Responsabilidade Social Corporativa (RSC) co albergue Alentea S. L. (Concello de Covelo, contorna do Tea), co obxectivo de fomentar a bioeconomía, unha das finalidades do proxecto.

Xestión de especies exóticas invasoras

O traballo de campo centrouse principalmente na xestión das especies exóticas invasoras, unha das principais causas de degradación dos ecosistemas fluviais. No río Tambre retiráronse máis de 960 quilos de Tradescantia fluminensis e actuouse sobre acacias mediante técnicas de descortizamento; no Tea interviuse en tres quilómetros afectados por bambú, falsa acacia, tintureira e crocosmia; e no Limia traballouse na contención da Ludwigia grandiflora, con actuacións ao longo de seis quilómetros.  Nos ríos Arnego e Bibei puxéronse en marcha accións de alerta temperá para frear novas invasións. Boa parte destas intervencións completáronse con revexetación con especies autóctonas, unha das chamadas Solucións Baseadas na Natureza que facilita a recuperación do bosque de ribeira.

Educación ambiental nos centros de ensino

O proxecto Fluviatilis tamén fixo a súa incursión nunha trintena de centros de ensino dos cinco ámbitos de actuación, nos que a equipa ambiental de ADEGA instalou unha mostra itinerante sobre invasoras e desenvolveu actividades canda á rapazada no río para o recoñecemento de especies, co obxectivo de achegar coñecemento dos ecosistemas fluviais da contorna e analizar de forma lúdica a súa calidade ecolóxica.

Publicidade

Preme para contactar con nós e pregunta polas tarifas que son unha bicoca!

Para ADEGA, Fluviatilis demostra que a combinación de custodia, participación social e intervención directa é unha ferramenta eficaz para mellorar a resiliencia dos ecosistemas fluviais ao cambio climático. A asociación subliña que o coidado dos ríos galegos require continuidade, compromiso institucional e apoio social, e lembra que os problemas que afectan o noso patrimonio fluvial, como a perda de bosque de ribeira, a expansión de invasoras e a contaminación, esixen unha resposta sostida no tempo. 

O proxecto Fluviatilis contou co apoio da Fundación Biodiversidad do Ministerio para la Transición Ecológica y el Reto Demográfico (MITECO) no marco do Plan de Recuperación, Transformación y Resiliencia (PRTR), financiado pola Unión Europea - NextGenerationEU.