Actuarase na igrexa de Paradela, en Toques, e na de Carteire, en Palas de Rei

A Xunta renova o convenio coas dioceses galegas con 600.000 euros para intervencións en 16 igrexas parroquiais

Laura Moure/Toques/Palas de Rei

O Consello da Xunta deu onte luz verde á renovación do convenio de colaboración entre a Xunta de Galicia e as dioceses galegas para contribuír a pequenas actuacións de conservación e mantemento de 16 igrexas parroquiais que forman parte do patrimonio cultural de Galicia. Así, o acordo prevé este ano unha achega de 600.000€ para realizar distintas intervencións de protección e rehabilitación nestes bens ao longo do ano.

A igrexa de Paradela, Toques.

Cómpre destacar que o importe se incrementou significativamente con respecto ao anterior acordo, en 250.000€, chegando así a un maior número de parroquias e bisbarras, colaborando na preservación do patrimonio e no desenvolvemento de áreas rurais. As partidas repártense entre as seis dioceses existentes, de tal xeito que a de Lugo recibirá 147.600€ para levar a cabo a reparación das cubertas na igrexa de Santo Estevo, en Baralla; na de San Paio de Paradela, en Toques; na de Santa María de Cabanela, en Navia de Suarna; na de Santa María de Carteire, en Palas de Rei, e no complexo pastoralparroquial de Ferreira de Pallares, en Guntín.

Pola súa banda, a Diocese de Santiago percibirá 129.000€ para actuar na reconstrución do cerramento da igrexa de San Martiño de Tiobre, en Betanzos, e na renovación da cuberta e das fachadas de San Pedro de Vilar, en Pontedeume. Mentres, na Diocese de Ourense destinaranse 113.400€ a investir na eliminación de humidades en Santa María de Feces de Abaixo, en Verín; en San Lourenzo de Piñor, en Barbadás, e en San Ramón de Armariz, en Nogueira de Ramuín.

Publicidade

Preme na imaxe para obter máis información do evento.

Ao abeiro deste convenio, tamén se achegarán 94.800€ á Diocese de Mondoñedo-Ferrol, que permitirán mellorar as condicións da igrexa de Nosa Señora das Dores, en Ferrol, con traballos de limpeza e consolidación das súas torres, e renovar as cubertas de Santiago de Quende, en Abadín, e da igrexa de San Tirso de Portocelo, en Xove. A esta partida sumaráselle a de 76.200€ da Diocese de Tui-Vigo, que se repartirá entre o acondicionamento de San Martiño de Verducido, na Lama, coa rehabilitación da cuberta, e San Martiño de Vilasobroso, en Mondariz, poñendo solución ás humidades.

Ademais, á Diocese de Astorga corresponderanlle 39.000€ para o desenvolvemento de obras de reparación da cuberta na igrexa de Lamalonga, na Veiga.

Colaboración estable

O convenio renovado onte forma parte do compromiso do Goberno galego coa preservación do patrimonio cultural de todo o territorio e enmárcase na colaboración estable que a Consellería de Cultura, Lingua e Xuventude mantén coas dioceses galegas para a posta en valor dos seus bens máis senlleiros.

Publicidade

Así, o acordo é garante da realización das intervencións necesarias propostas polas dioceses para a protección, conservación e rehabilitación das igrexas parroquiais pertencentes ao patrimonio artístico de titularidade eclesiástica. Deste xeito, polo seu alto valor artístico, cultural e histórico, desde a Xunta vélase pola súa conservación a través de distintas axudas, como as enmarcadas no convenio mixto, a través do que atende, realizando investimentos directos, as necesidades de mantemento e restauración destes bens, aos que destinou 1,2M€ desde o 2019.

Ademais, cómpre destacar que moitos dos bens culturais da igrexa están incorporados á lista do patrimonio mundial ao estaren vencellados ao Camiño Francés e aos Camiños do Norte, ademais de contar con grandes mosteiros, abadías, conventos, conxuntos catedralicios e diferentes monumentos declarados ben de interese cultural.