Acadar impulsa a inclusión sociolaboral de mulleres con discapacidade en Silleda

Laura Moure/Silleda

A Asociación de Mulleres con Discapacidade de Galicia, ACADAR, pon en marcha unha nova edición do Servizo de Inclusión e Transición ao Emprego, unha iniciativa dirixida a mellorar a inclusión sociolaboral e promover o desenvolvemento das capacidades de 35 mulleres con discapacidade.

Este programa nace como resposta ás dificultades que moitas mulleres con discapacidade atopan para acceder e manter un emprego, sendo a independencia económica un elemento clave para acadar unha vida autónoma e plena. A través dunha intervención individualizada e adaptada ás necesidades de cada participante, o servizo desenvólvese en Santiago de Compostela (dirixido a 13 mulleres), Lugo (8 mulleres), Ourense (4 mulleres), O Carballiño (4 mulleres) e Silleda (6 mulleres).

O proxecto inclúe entrevistas individuais e o deseño de itinerarios personalizados orientados á mellora das competencias persoais, sociais e laborais. Ademais, prestarase especial atención ao manexo das novas tecnoloxías, consideradas unha ferramenta esencial para favorecer a autonomía e a empregabilidade.

 PUBLICIDADE

Se queres obter máis información do evento preme na imaxe.

De xeito complementario, organizaranse obradoiros grupais nos que se fomentará o apoio mutuo, a participación social e o intercambio de experiencias, elementos fundamentais para avanzar cara aos obxectivos de inserción laboral.

 PUBLICIDADE

Preme para obter máis información.

Este servizo está financiado con cargo aos fondos do 0,7 % do IRPF, procedentes das persoas contribuíntes que marcan o recadro 106 de “Actividades de Interese Xeral consideradas de Interese Social”, coñecido como X Solidaria, e conta co cofinanciamento da Xunta de Galicia.