Acadar desenvolverá en Silleda novos itinerarios de emprego dirixidos a mulleres con discapacidade

Abordará competencias prelaborais e o uso de ferramentas para a procura de Emprego

Laura Moure/Silleda

O municipio de Silleda desenvolverá en Silleda unha nova edición dos seus itinerarios de emprego dirixidos a mulleres con discapacidade, unha iniciativa promovida por ACADAR en colaboración co Concello. Este programa está deseñado para adaptarse ás necesidades específicas das participantes e ten como principal obxectivo facilitar a súa inserción laboral mediante itinerarios personalizados. Ao longo das sesións traballaranse habilidades sociais, comunicativas, formativas e competencias prelaborais clave.

Foto de arquivo doutra edición.

Entre os contidos que se abordarán inclúense aspectos prácticos como a elaboración do currículo, a procura de ofertas de emprego adaptadas a persoas con discapacidade e o funcionamento das Empresas de Traballo Temporal (ETT). Tamén se prestará especial atención ao uso das novas tecnoloxías e aplicacións para a busca activa de emprego, así como ao aproveitamento das redes sociais neste ámbito.

 PUBLICIDADE

Se queres obter máis información do evento preme na imaxe.

Ademais, os obradoiros ofrecerán formación sobre trámites administrativos básicos, como a obtención da Chave 365, a clave permanente, o uso do DNI electrónico ou a solicitude da vida laboral. Igualmente, trataranse cuestións relevantes como os estereotipos no ámbito laboral e o chamado “teito de cristal”.

A metodoloxía será participativa e dinámica, favorecendo a interacción entre as asistentes e a creación de espazos de socialización e apoio mutuo.

 PUBLICIDADE

Preme para obter máis información.

As mulleres interesadas en participar deberán contar cun recoñecemento oficial de discapacidade e poderán formalizar a súa inscrición enviando un correo electrónico a info@acadar.org

Dende o Concello de Silleda destacan a importancia desta iniciativa, que contribúe a mellorar as oportunidades de emprego e a promover a inclusión social das mulleres con discapacidade no municipio.