Abel Losada pon en valor en Cruces o Programa Cultiva para impulsar o relevo xeracional no campo
A gandería de Camanzo, especializada na cría e engorde de Porco Celta e Rubia Galega, recibirá durante cinco días a profesionais agrarios para compartir o seu modelo de produción, transformación e comercialización
Laura Moure/Vila de Cruces
O subdelegado do Goberno en Pontevedra, Abel Losada, visitou onte a gandería situada no lugar de Camanceiros, na parroquia de Camanzo, en Vila de Cruces, seleccionada como explotación modelo de acollida do Programa Cultiva 2026 do Ministerio de Agricultura, Pesca e Alimentación. Estivo acompañado de Fernando Calviño, titular da explotación; da técnica veterinaria da Asociación de Criadores da Raza Porcina Celta (Asoporcel), Cruz Castro; e do alcalde de Vila de Cruces, Luís Taboada.
A visita produciuse poucos días despois do peche do prazo para solicitar as estancias formativas desta edición, que rematou o 20 de setembro. O Programa Cultiva conta este ano cunha dotación inicial de 1,2 millóns de euros e ofrece un catálogo de 300 explotacións modelo de acollida de toda España. Desde a súa posta en marcha en 2020 acumula máis de 900 participantes. Neste caso desenvólvese en colaboración coa Asociación de Criadores de Ganado Porcino Celta (ASOPORCEL) e da propia explotación.
Losada destacou que “esta iniciativa permite que o coñecemento e as boas prácticas que xa existen no noso rural se convertan nunha ferramenta de formación para outros profesionais. É unha maneira moi práctica de favorecer o relevo xeracional, a innovación e a modernización do sector agrario”.
A explotación visitada conta cunhas 15 hectáreas, 50 exemplares de Porco Celta e 25 cabezas de Rubia Galega. A súa actividade principal é a cría e engorde de Porco Celta, combinada coa venda directa ao consumidor e a comercialización de leitóns para outros cebadoiros.
O proxecto destaca tamén pola aposta por incrementar o valor engadido da produción. Dispón da marca propia CMF Celtaporc e participa, xunto con outro gandeiro, na cooperativa que xestiona a carnicería Orixes Galegas, en Boqueixón. Comercializa os seus produtos con clientes particulares e coa alta restauración e participa en feiras e actividades de promoción. A explotación contribúe ademais á conservación de razas autóctonas, especialmente do Porco Celta, raza en perigo de extinción.
PUBLICIDADE
“Aquí vemos que producir é só unha parte do proxecto. Hai tamén transformación, comercialización directa, cooperación entre produtores e recuperación dunha raza autóctona. Precisamente este tipo de experiencias son as que Cultiva busca compartir e trasladar a outros profesionais do sector”, sinalou o subdelegado.
A estancia formativa prevista nesta explotación terá unha duración de cinco días e desenvolverase na segunda quincena de abril de 2027. Entre os contidos que abordará figuran a xestión económica das explotacións, o uso de tecnoloxías dixitais, o benestar animal, a recuperación de razas autóctonas, as prácticas sostibles, os sistemas de calidade e a transformación e comercialización agroalimentaria. A entidade encargada da súa xestión é ASOPORCEL.
Formación directamente nas explotacións
O Programa Cultiva está dirixido a profesionais agrarios titulares de explotación de ata 40 anos e tamén a maiores de 41 que se incorporasen á actividade nos últimos cinco anos. As persoas participantes poden formarse en explotacións de calquera punto de España e o programa cobre os gastos de aloxamento, manutención e transporte, ademais de contemplar unha compensación polos gastos de substitución necesarios para atender a súa propia explotación durante a estancia.
PUBLICIDADE
Losada agradeceu finalmente “a implicación de Asoporcel e, especialmente, das explotacións que abren as súas portas para compartir o seu coñecemento e experiencia”. “O seu compromiso é imprescindible para que un programa coma Cultiva funcione e para que o coñecemento adquirido durante anos no territorio poida servir a unha nova xeración de profesionais”, concluíu.
Na provincia de Pontevedra, o Programa Cultiva 2026 conta con 5 explotacións modelo de acollida, situadas en Cerdedo-Cotobade, Vila de Cruces, Tomiño, Redondela e O Rosal. En conxunto, ofertan 11 estadías formativas de cinco días, que se desenvolverán entre febreiro e setembro de 2027.
Comentarios