A Xunta traballa nas medidas para chegar a un acordo respecto da poxa de recría en Silleda

Anima aos compradores a sumar e seguir impulsándoa entre todos

Laura Moure/Silleda

O conselleiro de Presidencia, Xustiza e Deportes, Diego Calvo, asegurou onte que a Xunta está a estudar as peticións formuladas a semana pasada polos compradores críticos co novo sistema dixital implantado para a poxa de recría no recinto feiral de Silleda. De feito, desde o encontro mantido en San Caetano hai escasamente unha semana, Diego Calvo visitou xa en dúas ocasión o recinto feiral. A última delas este martes, cando estivo presente na nave na que se realiza a poxa de recría co obxectivo de falar con compradores e vendedores e comprobar sobre o terreo a posible aplicación das melloras solicitadas polos citados compradores.

O conselleiro incidiu en que “a Xunta tendeu a man para solventar esta situación e estamos xa vendo a aplicación das posibles medidas, se ben é certo que algunhas delas conlevan máis tempo na súa implantación ca outras”. Non obstante, sinalou que, vendo que xa se está actuando, “para que haxa unha solución é preciso que os compradores poñan tamén da súa parte”, remarcou o conselleiro. 

Publicidade

Preme na imaxe para obter máis información do evento.

Diego Calvo explicou que, se ben o sistema de dixitalización implantado continuará, tras escoitar as propostas trasladadas polos compradores, serán tidas en conta e faranse melloras no mesmo. Agárdase que estes cambios na aplicación estean operativos ao longo do mes de xuño. 

Ademais, dado o crecemento e éxito da feira durante os últimos anos estudarase a ampliación da superficie dedicada á recría para poder contar con máis animais e, tamén, para que haxa menos animais por gaiola. 

Publicidade

Preme na imaxe se queres contactar connosco.

O conselleiro de Presidencia insistiu en que “todas estas melloras non son inmediatas, pero tras a reunión da semana pasada xa estamos a traballar nelas, polo que estando clara esta vontade da Xunta, agardamos tamén que exista a mesma vontade por parte dos compradores, aos que facemos un chamamento para que sigan participando e, entre todos, seguir facendo crecer a poxa”, concluíu.