A Xunta recoñece os proxectos de investigación de 16 centros, entre eles do Pintor Colmeiro de Silleda

Trátase de iniciativas que desenvolven contidos en diversos ámbitos do coñecemento como as matemáticas, o patrimonio, a xeografía, a natureza, a arte ou a ciencia

Laura Moure/Silleda

A Xunta premia as iniciativas de 16 centros educativos no XI Concurso de Traballos por Proxectos impulsados desde as bibliotecas escolares e entre eles figura o instituto de Silleda. Trátase de iniciativas que responden a temas de interese do alumnado e que desenvolven contidos curriculares en diversos ámbitos do coñecemento como as matemáticas, o patrimonio, a xeografía, a natureza, a arte ou a ciencia, entre outros.

O obxectivo do certame é favorecer que os estudantes reforcen as competencias clave a través do desenvolvemento de proxectos de carácter interdisciplinario ou de proxectos de investigación desde a biblioteca escolar. Ao mesmo tempo, impúlsase o traballo en equipo entre os máis novos.

A convocatoria contemplaba catro modalidades de participación. Na primeira delas, de proxectos que combinan diversas materias coordinados desde a biblioteca escolar e que conten coa participación dun mínimo do 40% dos grupos-aula do centro, prémianse 10 centros, que reciben cada un 2.000€ para gastos relacionados co traballo presentado.

 Publicidade

Preme para obter máis información.

Na segunda modalidade, de iniciativas de investigación dirixidos por profesorado dun grupo ou nivel, e na terceira categoría, de proxectos de investigación dirixidos por profesorado para grupos de diferentes cursos ou niveis, os premios son de 1.500€ por centro. Na cuarta modalidade, de proxectos de investigación intercentros para desenvolver un proxecto común, o galardón ascende a 3.000 €.

 PUBLICIDADE

Preme na imaxe para contactar con nós!

En concreto, premiou centros de Brión, Carballo, Coristanco, Santiago, Celanova, Cerdedo-Cotobade, Cuntis, A Lama, Meaño, Salvaterra de Miño, Silleda, O Grove, O Porriño, Vigo e Vilagarcía de Arousa. O IES Plurilingüe Pintor Colmeiro de Silleda foi premiado na modalidade 1. Todos os centros poden consultarse no enlace: https://www.xunta.gal/notas-de-prensa/-/nova/022601/xunta-reconece-proxectos-investigacion-16-colexios-institutos-impulsados-desde