A Xunta e os 9 destinos Starlight, entre eles Lalín, traballan para poñer en valor a eclipse solar de agosto

O fenómeno astronómico preséntase como unha oportunidade única para captar visitantes ao longo de toda a xeografía galega

Laura Moure/Lalín

O director de Turismo de Galicia, Xosé Merelles, mantivo unha reunión de traballo este xoves con representantes dos destinos Starlight co fin de coordinar a promoción turística da eclipse que terá lugar o vindeiro mes de agosto e tamén analizar as previsións en canto a visitas destas áreas na data de observación do fenómeno natural, extraordinariamente infrecuente que converterá a comunidade nun dos mellores lugares do mundo para a súa visualización. O fenómeno astronómico poderase ver de modo total en seis dos nove destinos Starlight e nos outros tres contemplarase de forma parcial.

Na reunión participaron responsables dos destinos Starlight de Chantada; da Reserva da Biosfera dos Ancares Lucenses e montes de Navia, Cervantes e Becerreá, de Lalín; da Costa da Morte; da Reserva da Biosfera Mariñas Coruñesas; de Muras; do Parque Nacional das Illas Atlánticas de Galicia, e de Trevinca Valdeorras.

Lalín é berce da historia astronómica de Galicia, xa que entre os seus Fillos Ilustres está o grande astrónomo Ramón Mª Aller que puxo en marcha o Observatorio de Lalín (recuperado en 2011), base para fundar o Observatorio da USC. Escolleuse como punto de observación un vértice xeodésico na parroquia de Maceira situado a 743 m de altitude desde o que se domina unha panorámica de 360º, sendo de día un magnífico miradoiro desde o que se ven os principais cumios da comarca de Deza e a súa contorna: o Farelo, a serra do Faro, o Candán, o Carrio e incluso o Pico Sacro cara a Compostela. Por outra banda, de noite é un lugar privilexiado desde onde se pode contemplar o ceo en todo o seu esplendor incluíndo unha perfecta vista da Vía Láctea. Ademais deste lugar, suxírense outros dous puntos de observación, un deles nun outeiro sito en Albarellos e outro moi preto da Fraga de Catasós. 

Durante o encontro, no que estivo acompañado pola directora de Promoción, Carmen Pita, Xosé Merelles puxo a disposición destes responsables o espazo web da eclipse que se pode consultar na web www.turismo.gal, no que se recompila información turística vinculada á eclipse, incluíndo os concellos situados na franxa de totalidade animádoos a enriquecela e sumar todos aqueles aspectos que consideren de interese. “A plataforma -dixo- conta cun mapa interactivo que permite consultar, punto por punto, a hora de inicio, duración e tipo de eclipse —total ou parcial— en cada localización”.  Segundo explicou, “este espazo irá incorporando nova información de interese a medida que se achegue a data”.

Paralelamente, o director de Turismo de Galicia tamén sinalou a participación deste departamento en feiras e eventos profesionais nos que participa, “co obxectivo de posicionar a Comunidade como porta de entrada ao gran eclipse total de 2026”.

Oportunidade única

Do mesmo xeito, Xosé Merelles comprometeu o traballo da Xunta de Galicia para “dec maneira coordinada, aproveitar esta oportunidade única desde o punto de vista turístico, científico e de proxección internacional, garantindo ao mesmo tempo a seguridade e a correcta organización dun acontecemento que espertará unha notable afluencia de visitantes”.

 Publicidade

Preme para obter máis información.

Neste sentido, destacou as previsións de reservas de ocupación que baralla o Cluster de Turismo de Galicia que apuntan a un incremento significativo de visitantes internacionais e que fixeron que “moitas empresas receptivas leven tempo traballando”. “A coincidencia coa primeira quincena de agosto fai prever niveis de ocupación superiores ao 90-95%, situándose en parámetros de máxima ocupación”, salientou.

Finalmente, o director de Turismo de Galicia lembrou que, co obxectivo de garantir unha observación segura e ordenada, a Xunta de Galicia constituíu unha comisión interdepartamental na que participan representantes das consellerías de Presidencia, Xustiza e Deportes; Medio Ambiente e Cambio Climático; Sanidade; Educación, Ciencia, Universidades e FP; así como Turismo de Galicia.

O traballo conxunto realizado permitirá anticipar e coordinar actuacións en materia de mobilidade, prevención de riscos, seguridade, protección civil e divulgación científica, entre outros ámbitos. Xosé Merelles subliñou que “a colaboración entre administracións será fundamental”.

 PUBLICIDADE

Preme na imaxe para contactar con nós!

Visible desde catro países

A eclipse terá lugar o vindeiro 12 de agosto e a fase de totalidade —momento no que a lúa oculta completamente o sol— só será visible desde catro países, entre eles España. Trátase dun fenómeno que non se produce na Península desde 1912, hai máis de 110 anos, e que non volverá repetirse con carácter total ata o ano 2180.

A franxa de totalidade atravesará o territorio galego desde Estaca de Bares, en Mañón, ata a comarca de Valdeorras, limítrofe con Castela e León, percorrendo áreas das catro provincias. En total, 143 concellos galegos —o 45,6% do total— situaranse na zona de observación privilexiada, abarcando o norte da provincia da Coruña, a práctica totalidade da provincia de Lugo, o nordeste da provincia de Ourense e áreas do interior de Pontevedra. No resto do territorio a eclipse poderá observarse de maneira parcial.

Segundo as previsións, o fenómeno comezará arredor das 19:31 horas e prolongarase ata as 21:23 horas, acadando o seu momento de máxima escuridade entre as 20:28 e as 20:30 horas, en función da localización.