A Xunta aproba definitivamente a 1ª modificación do PXOM de Silleda no parque empresarial Área 33
- Laura Moure
- hace 30 minutos
- 3 Min. de lectura
Este Concello recalca que o informe técnico sobre as acacias da Avenida do Parque foi posto a disposición dos grupos fai 5 meses
Laura Moure/Silleda
A Xunta de Galicia vén de aprobar definitivamente a primeira modificación puntual do Plan Xeral de Ordenación Municipal (PXOM) de Silleda, unha actuación que afecta ao parque empresarial Área 33 e que permitirá reorganizar os espazos libres e zonas verdes existentes neste ámbito industrial. Esta modificación foi impulsada polo Concello de Silleda co obxectivo de adaptar a ordenación urbanística do polígono á realidade actual deste parque empresarial, mellorando a distribución das zonas verdes e garantindo unha
organización máis funcional dos espazos libres.
En concreto, a actuación supón unha reordenación das zonas verdes existentes no entorno dunha parcela situada neste parque empresarial, permitindo unha mellor integración destes espazos no conxunto do polígono e optimizando a súa funcionalidade.
Un paso máis na mellora do parque empresarial
A alcaldesa de Silleda, Paula Fernández, valora positivamente a aprobación definitiva desta modificación puntual, que permitirá avanzar na mellora da ordenación urbanística deste ámbito empresarial.
Fernández destaca que “esta modificación do PXOM permitirá adaptar a planificación urbanística á realidade actual do parque empresarial Área 33, reorganizando as zonas verdes e mellorando a funcionalidade deste espazo industrial” A rexedora sinala tamén que esta actuación “é un exemplo de planificación responsable, que busca compatibilizar o desenvolvemento económico coa correcta ordenación do territorio e cos espazos verdes necesarios nun polígono destas características”.
Publicidade
Tramitación urbanística
A modificación puntual foi aprobada inicialmente polo pleno municipal o 30 de
maio de 2025, iniciando así a súa tramitación administrativa. Posteriormente, o documento foi sometido aos correspondentes informes sectoriais e ao proceso de avaliación ambiental establecido pola normativa urbanística vixente, culminando agora coa aprobación definitiva por parte da Xunta de Galicia.
Por outra banda, antes as declaracións do BNG loca, o Concello de Silleda lembra que "o informe técnico sobre o estado fitosanitario das acacias da Avenida do Parque foi posto
a disposición de todos os grupos municipais, de forma expresa e directa, no pleno extraordinario celebrado o 16 de outubro de 2025 e solicitado precisamente polos dous grupos da oposición para falar, precisamente, entre outros asuntos, destas árbores".
"Esta posta a disposición, deixando a alcaldesa o documento impreso enriba da mesa queda corroborada na gravación audiovisual oficial da sesión (a partir da hora 2:32). Pese a iso, ningún grupo recolleu o documento". "Depositei unha copia íntegra deste informe sobre mesa e ao alcance de todos os grupos municipais na sesión plenaria e non o recolleron”, sinala a alcaldesa, Paula Fernández, que recorda que o informe foi remitido ese mesmo día do pleno aos medios de comunicación para o seu coñecemento público.
Sobre a acusación de que non forma parte de ningún expediente, explicase que se trata dun informe técnico de valoración solicitado á Estación Fitopatolóxica do Areeiro solicitado a raíz das advertencias verbais realizadas polos propios técnicos cando viñeron informar sobre as acacias do parque da Igrexa, ca intención de rebatir os argumentos contrarios á corta das árbores.
PUBLICIDADE
A rexedora considera, por tanto, que “o dereito á información dos membros da Corporación foi respetado, garantizando así a transparencia da entidade local” e considera que a solicitude extemporánea deste documento responde novamente “a unha campaña deseñada para o ruido político”.
"O informe , elaborado pola Estación Fitopatolóxica do Areeiro -dependente da Deputación de Pontevedra- a petición da alcaldía, analiza o estado dos seis exemplares de acacia negra existentes neste tramo da avenida e conclúe que presentan diversos problemas estruturais e fitosanitarios que aconsellan a súa retirada polo risco de quebradura ou caída, ademais de concluir que se trata dunha especie exótica, invasora e de escaso valor ecolóxico", recalcan dende o Concello.
Retirada dentro das obras de humanización
A retirada destas árbores realizarase nos próximos días no marco das obras de mellora e humanización da Avenida do Parque e do seu entorno, actuación que permitirá tamén renovar o arborado deste tramo con especies máis adecuadas ao espazo urbano.
Comentarios