A xira das food trucks do Sabor das Rías Baixas chega a Lalín o 3, 6 e 7 de maio

É unha campaña da Deputación de Pontevedra na que distribúe de balde preparacións inspiradas nos pratos típicos dos eventos gastronómicos de interese turístico da provincia

Laura Moure/Lalín

A Deputación de Pontevedra continúa a xira das food trucks do Sabor das Rías Baixas con parada en Lalín, Meis e Mondariz Balneario os días 3, 6 e 7 de maio. En Lalín e food truck estará dispoñible na Praza da Igrexa de 12:00 a 14:00 e de 17:00 a 19:00 horas, en Meis na Praza de España de Mosteiro de 12:30 a 18:30 horas e en Mondariz Balneario situarase o 3 e 7 de maio na Casa do Concello e o día 6 nos xardíns do Gran Hotel, en horario de 11:30 a 14:30 e de 18:00 a 21:00 horas. Nos tres concellos a institución provincial distribuirá de xeito gratuíto preparacións inspiradas nos pratos típicos dos eventos gastronómicos de interese turístico da provincia.

O Sabor das Rías Baixas conta cunha frota de tres vehículos que realizan tres rutas polo norte, o centro e o sur da provincia informando sobre a oferta das festas gastronómicas, promocionando e poñendo en valor a gastronomía pontevedresa, e promovendo unha xestión sostible dos recursos desde o punto de vista económico, ambiental e social. Ademais das degustacións inspiradas nos pratos típicos destes eventos, nas food trucks repártese material promocional onde se recollen as datas de celebración, os produtos gastronómicos de referencia cunha breve descrición, e mais o lugar exacto onde se celebra cada festa. Ata a data, distribuíronse xa máis de 48.500 tapas gratuítas inspiradas nas festas gastronómicas de interese turístico.

 PUBLICIDADE

Se queres obter máis información do evento preme na imaxe.

O Sabor das Rías Baixas é un paso adiante da Deputación para diversificar a oferta turística da provincia, co obxectivo de atraer turismo interno durante a temporada baixa, e para a descentralización das actividades levadas a cabo por Turismo Rías Baixas en todos os concellos. Este programa serve como ferramenta estratéxica para achegar ao público experiencias culinarias vinculadas á identidade cultural da provincia, para crear novas oportunidades de visita e consumo e tamén para favorecer a actividade económica local.

 PUBLICIDADE

Preme para obter máis información.

As festas promovidas son a Festa do Lacón con Grelos (Cuntis), a Festa do Caldo de Mourente (Pontevedra), a Festa Encontro-Degustación do Millo Corvo (Bueu), Festa da Ostra de Arcade (Soutomaior), a Festa do Requeixo e o Mel (A Neves), a Festa do Choco (Redondela), a Festa do Salmón (A Estrada), a Festa da Troita (Ponte Caldelas), a Festa do Galo de Curral (Vila de Cruces), a Festa da Langosta (A Guarda), a Festa da Vieira e Festa do Albariño (Cambados), a Feira do Viño do Rosal, a Festa do Carneiro ao Espeto (Moraña), a Romaría da Tortilla de Laro e a Festa da Empanada da Bandeira (Silleda), a Festa do Mexillón e o Berberecho (Vilanova de Arousa), a Festa-Feira do Xamón (A Cañiza), a Festa da Lamprea e a Festa da Lamprea Seca (Arbo), a Festa da Ameixa do Carril (Vilagarcía de Arousa), a Festa da Anguía e Mostra da Caña do País (Valga), a Festa do Viño do Condado do Tea (Salvaterra de Miño), a Festa do Marisco (O Grove) e a Feira do Cocido (Lalín).