A Plataforma Veciñal Touro-O Pino Mina Non reúnese con deputados do PSOE e do PP

Hoxe estará recollendo alegacións na Praza de Abastos de Santiago

Ecos da Comarca/Touro

Membros da Plataforma Veciñal Touro-O Pino MINA NON reuníronse esta semana con deputados do PSOE e do PP para expresarlles as súas preocupacións ante a posible reapertura da mina de Touro O Pino. O 31 de xaneiro remata o prazo para presentar alegacións a este proxecto.

Por un lado, as deputadas do PSdG-PSOE, Paloma Castro Rey, responsable de Medio ambiente, e Patricia Iglesias Rey, de Enerxía e Minería, recibiron este martes Parlamento de Galicia a unha delegación da Plataforma Veciñal Touro-O Pino MINA NON, respondendo así á solicitude que tiña realizado a citada Plataforma.

Ao longo das dúas horas que durou a entrevista, os e as representantes veciñais explicaron polo miúdo as razóns da oposición cidadá á reapertura da mina de cobre en Touro-O Pino, "por ser gravemente prexudicial para a saúde das persoas, para o Medio ambiente, para a economía agro gandeira da zona,e máis alá para todos os pobos da Ribeira do Ulla e para a propia Ría de Arousa e a súa actividade pesqueira e marisqueira".

As deputadas do PSOE manifestaron non só a súa comprensión e empatía coa problemática exposta, senón que se mostraron contrarias a reapertura da mina, iso si, a nivel persoal, comprometéndose a trasladar ao seu Grupo e ao Partido as inquedanzas e razón expostas e a defender no, seu seo, o posicionamento contrario á reapertura da dita mina de cobre. Amosaron tamén o seu interese por visitar persoalmente a zona afectada. Visita que quedaron de concertar cos membros da Plataforma

Publicidade    

Preme na imaxe se queres contactar connosco.

Por outra banda, onte os deputados do PP, Gonzalo Tremor, portavoz de Medio ambiente, e Rubén Lorenzo, portavoz de Industria e enerxía recibiron no Parlamento de Galicia a unha delegación de cinco representantes da Plataforma Veciñal Touro-O Pino MINA NON,

respondendo así á solicitude que tiña realizado a citada Plataforma.

Na entrevista, os representantes veciñais expresaron a súa preocupación pola posibilidade de reapertura da Mina de cobre. Sinalaron a agresión que suporía, por exemplo, vivir a carón (200 metros) dunha balsa de residuos tóxicos de 80 metros de altura, 3 quilómetros de longo e 125 hectáreas de superficie. Ou establecer unha industria contaminante nunha comarca próspera como a de Arzúa con granxas que suman máis de 35.000 cabezas de gando, e máis de 13.000 en ambos concellos afectados, que son sustento dun gran número de familias que viven da agricultura; ou co Camiño Francés de Santiago discorrendo a escasos 2 quilómetros dunha mina a ceo aberto, con explosións constantes, aire contaminado e pó en suspensión. Entenden os veciños que, cun proxecto

practicamente idéntico ao anterior, xa rexeitado polo Goberno Galego, non debería nunca ser declarado de interese estratéxico e non debería contemplarse sequera a posibilidade de ser aprobado pola Xunta de Galicia.

"Os deputados do PP trataron de xustificar a declaración do proxecto de reapertura da mina como de interese estratéxico e sinalaron tamén que estaban preocupados polo asunto e, tras algunha dúbida, aceptaron considerar a posibilidade de visitar a zona da mina, se ben non comprometeron nin estableceron data. Tras 45 minutos, a entrevista rematou. O encontro, que transcorreunun clima de cordialidade pero, iso si, sen concreción de acordo ou medida a tomar ningunha", sinala a plataforma.

Hoxe, 30 de Xaneiro, penúltimo día do período de alegacións, a Plataforma establecerá unha mesa informativa e de recollida de alegacións na Praza de Abastos de Santiago.