A parroquia melidense de Furelos viaxa no tempo e revive o ano 1900
Clausura hoxe o seu IX Mercado de Época que inclúe unha programación variada e o servizo de transporte en tren turístico
Laura Moure/Melide
A parroquia de Furelos atópase mergullada no ano 1900 coa celebración do IX Mercado de Época, organizado polo Concello de Melide, que transforma durante esta fin de semana a imaxe habitual da parroquia. Os postos de artesanía e alimentación, as exposicións, os obradoiros de oficios e os figurantes recrean a vida de comezos do século XX, nunha cita que reúne a veciñanza e visitantes e que continuará ata hoxe, domingo.
PUBLICIDADE
O alcalde de Melide, José Manuel Pérez, e os edís Xosé Igrexas, responsable da área de Comercio, e Carmen Liñeira, responsable de Política Social, compartiron a xornada de onte coa veciñanza e visitantes, percorrendo o mercado e acompañándoos nas diferentes
actividades programadas. Dende o Concello de Melide convidan á veciñanza e visitantes
a achegarse a Furelos para percorrer o mercado e gozar das actividades que aínda
quedan por diante nesta novena edición, aproveitando tamén o tren turístico que facilita o
desprazamento dende o centro da vila.
PUBLICIDADE
Música, teatro e espectáculos durante toda a fin de semana
Durante toda a fin de semana hai tamén animación musical, pasarrúas e teatro de rúa, coa
presenza de personaxes como a Muller Barbuda, unha pitonisa, unha criada de época e
unha carteira de época, ademais dun espectáculo de circo e un baile de Charlestón. Ao
remate de cada xornada terá lugar un espectáculo aéreo e outro de lume.
Un ano máis, o mercado conta co habitual tren turístico, que une o centro da vila de Melide con Furelos, con paradas diante da Capela de San Roque e na propia parroquia. O
servizo está dispoñible de 11:00 a 14:00 e de 16:00 a 20:00 horas.
PUBLICIDADE
NOS VINDEIROS DÍAS PUBLICAREMOS REPORTAXE AUDIOVISUAL
Comentarios