A obra orixinal do cartel da L Festa da Empanada de Bandeira sae a subasta

A estrea do mural «Lección de Empanada», Yoseba MP abre hoxe, xoves, as celebracións

festivas desta localidade

Laura Moure/Silleda

A Bandeira estreará hoxe, xoves 20 de agosto, ás 13:00 horas, o mural “Lección de Empanada”, obra do artista Yoseba MP creada con motivo do 50 aniversario da Festa da Empanada da Bandeira. O acto de inauguración servirá como unha das primeiras citas da programación desta edición tan especial da festa, declarada de Interese Turístico Nacional, e estará aberto á veciñanza, asociacións e colectivos da vila, ademais das persoas protagonistas da propia obra. Na presentación intervirán o deputado de Turismo da Deputación, Jesús Vázquez Almuíña, a alcaldesa, Paula Fernández e o presidente da Asociación Amigos da Empanada, Manuel Cuiña.

Unha homenaxe coral á tradición

“Lección de Empanada” parte dunha reinterpretación da coñecida obra de Rembrandt “A lección de anatomía do doutor Nicolaes Tulp”, trasladando a composición do cadro do século XVII a unha escena tan propia da Bandeira como a elaboración dunha empanada.

A actuación foi realizada co financiamento da Deputación de Pontevedra e permitirá incorporar unha nova obra de arte urbana ao espazo público da Bandeira, nesta ocasión estreitamente vencellada cun dos grandes símbolos gastronómicos, culturais e festivos do municipio.

Por outra banda, a Asociación Amigos da Empanada anuncia a subasta da obra orixinal que protagoniza a imaxe do cartel oficial da L Festa da Empanada de Bandeira, unha celebración declarada de Interese Turístico Nacional.

O cadro, pintado a man pola súa autora, Tania Cuiña, foi doado á Asociación pola propia artista. A entidade estima o seu valor en 500 euros, prezo co que sairá á subasta o vindeiro sábado, 22 de agosto, durante os actos oficiais da L Festa da Empanada.

A proposta artística de Tania Cuiña, veciña de Bandeira, converte a empanada en protagonista dunha das obras máis recoñecibles da historia da arte: “A creación de Adán”, de Miguel Anxo, recreando o universo da Capela Sixtina cunha mirada singular e cargada de simbolismo.

Licenciada en Belas Artes e con estudos de Fotografía Artística, Tania Cuiña achega nesta obra a súa visión artística á festa máis emblemática de Bandeira, creando unha peza que une arte, tradición, identidade e gastronomía.

E hai unha condición especial: se a obra non logra ser adxudicada polo prezo establecido, a Asociación Amigos da Empanada cederá o cadro á vila de Bandeira, coa intención de que quede como patrimonio da comunidade e sexa exposto nun dos centros públicos da localidade.

A vila da Bandeira inicia hoxe xoves con esta estrea, a Ruta da Empanadilla na que participan 6 establecementos, amenizada pola charanga local Os Gominolas e o festival Bandeirock.

Bandeirock abrirá o menú musical

A partir das 20.30 horas e con entrada de balde, o festival reunirá sobre o escenario a A Banda no Rock, Rebeliom do Inframundo, Arrhythmia, Loita Amada, Javi Maneiro, Marela e Storrentos, nunha noite pensada para transitar desde o rock e o metal ata o rap, o punk e os sons máis festivos.

 PUBLICIDADE

Preme na imaxe para obter máis información deste evento.

Será unha das grandes antesalas do 50 aniversario da Festa da Empanada e tamén unha mostra da diversidade dunha escena musical galega capaz de reunir nun mesmo cartel artistas de longa traxectoria, bandas en plena efervescencia e proxectos nacidos no propio municipio.

Abrirá a noite o espectáculo A Banda no Rock, da compañía local A Cova das Letras, -unha proposta para o público familiar, incluida no circuito Cultura no Camiño, que leva o rock ao universo das bandas de música mediante un espectáculo protagonizado por Cristina Collazo e Josito Porto, que compartirán escenario coa Banda Recreativa e Cultural da Bandeira.O espectáculo combina interpretación, teatralidade e repertorio rock, achegando este estilo musical ás novas xeracións a través dunha banda de música

Rebeliom do Inframundo: rap, lingua e identidade

Un dos grandes nomes da noite será Rebeliom do Inframundo, formación nacida en Ponteareas e asentada en Vigo que leva máis dunha década situando o rap en galego nun espazo propio, cunha proposta marcada polo compromiso social, a identidade e as raíces.

A banda chega ademais á Bandeira nun momento especialmente destacado da súa traxectoria, despois da publicación en 2026 de Orgulho, un traballo no que afondan nun discurso ligado á clase traballadora, á terra e á lingua e no que o hip hop dialoga con electrónica e elementos sonoros de raíz galega.

A súa será previsiblemente unha das actuacións máis contundentes da noite: versos directos, bases potentes e unha maneira de entender o escenario como lugar para a festa, pero tamén para a mensaxe.

Loita Amada, canción protesta pasada polo rock

Outro dos pratos fortes será Loita Amada, proxecto impulsado por Jásper, histórico músico da escena galega e antigo líder de NAO, xunto á pandereteira Nébeda Piñeiro. A formación nace da confluencia entre a canción protesta e o rock máis contundente, cun discurso no que pesan especialmente o compromiso social, a cultura galega, a liberdade e a resistencia. Jásper chega a este proxecto despois dunha longa traxectoria vinculada tamén a formacións como Xenreira ou A Matraka Perversa.

 PUBLICIDADE

Preme na imaxe para obter máis información do evento.

Loita Amada achegará así ao Bandeirock unha combinación especialmente directa de melodía, electricidade e letras reivindicativas.

Javi Maneiro, unha das voces do rock galego

E falar de rock galego das últimas décadas é falar tamén de Javi Maneiro. A súa voz quedou ligada desde comezos dos anos noventa a Heredeiros da Crus, unha das formacións fundamentais para entender o rock feito en Galicia, e posteriormente a proxectos como Jabón Blue e á súa carreira en solitario.

Maneiro chega á Bandeira nunha nova etapa persoal e artística, tras pechar a finais de 2025 a súa longa vinculación con Heredeiros da Crus.

A súa presenza no cartel aporta un dos grandes reclamos do festival e conecta directamente con varias xeracións que medraron ao ritmo do rock galego dos anos noventa e das décadas posteriores.

O toque máis próximo poñerao Marela, formación silledense de punk-rock ca que o Bandeirock volve poñer en valor a creación musical local nun escenario compartido con algunhas das formacións máis recoñecidas de Galicia.

 PUBLICIDADE

Preme na imaxe se queres contactar connosco.

Arrhythmia: metal galego mirando á vangarda

Arrhythmia, banda lucense que construíu unha identidade propia mesturando metal, electrónica, rap e rock, sempre co galego como lingua de expresión tamén estará nesta edición . A formación suma máis dunha década de percorrido e foi recoñecida nos Premios Martín Códax da Música tanto en 2018 como en 2023 dentro do ámbito do heavy e do metal.

Este mesmo ano abriu unha nova etapa coa publicación do EP CERØ, cinco temas cos que o grupo afonda nun son máis maduro e definido, mantendo esa mestura de intensidade, experimentación e contundencia que caracteriza os seus directos.

A noite contará tamén con Storrentos, banda que fai da mestura e da diversión a súa carta de presentación e que amenizará os entretempos do concerto. O seu repertorio viaxa polas versións de rock, folk, pop e punk, incorporando tamén outros rexistros festivos e convertendo os concertos en propostas especialmente participativas.